اندرون سندھ 16 اور کراچی میں 17 اکتوبر کو ہلکی بارش کا امکان ہے، محکمہ موسمیات

محکمۂ موسمیات نے 16 اور 17 اکتوبر کو کراچی سمیت سندھ کے مختلف علاقوں میں کہیں گرج چمک تو کہیں ہلکی بارش کی پیش گوئی کر دی۔

جیو نیوز کی رپورٹ کے مطابق محکمۂ موسمیات کا کہنا ہے کہ مغربی ہواؤں کا سلسلہ کل سے ملک کے شمالی علاقوں میں داخل ہو سکتا ہے، جو وسطی و بالائی سندھ تک پھیل سکتا ہے۔

محکمۂ موسمیات نے 16 سے 17 اکتوبر تک سکھر، لاڑکانہ، جیکب آباد اور دیگر علاقوں میں گرج چمک کیساتھ بارش کا امکان ظاہر کیا ہے۔

سترہ اکتوبر کو کراچی، ٹھٹہ، بدین، سجاول، تھر پارکر، عمر کوٹ اور حیدر آباد میں ہلکی بارش متوقع ہے۔ محکمۂ موسمیات کے مطابق کراچی میں آئندہ 3 روز کے دوران موسم گرم اور مرطوب رہے گا۔

اس دوران شہرِ قائد میں زیادہ سے زیادہ درجۂ حرارت 33 سے 35 ڈگری سینٹی گریڈ رہنے کا امکان ہے جبکہ مغرب اور جنوب مغرب سے ہوائیں بھی چلتی رہیں گی۔

Hurmat Majid