-
-
محکمہ موسمیات کی پیشگوئی کے عین مطابق ملک کے سب سے بڑے شہر کراچی سمیت سندھ بھر میں گرمی کی شدت میں اضافہ ہوگیا ہے۔
شہرقائد میں درجہ حرارت 40 ڈگری کو چھوگیا جبکہ شہر میں گرم ہواؤں کے باعث محسوس کئے جانے والا درجہ حرارت 42 سے 43 ڈگری سینٹی گریڈ ہے۔
محکمہ موسمیات کے چیف میٹرلوجسٹ سردار سرفراز نے گرمی سے بچاؤ کے لیے اپیل کرتے ہوئے کہا ہے کہ کراچی کے شہری صبح 11 سے 4 بجے کے دوران باہر نکلنے میں احتیاط کریں، گرمی کے باعث توانائی کی طلب بھی بڑھ جائے گی۔
سردار سرفراز نے شہریوں سے غیرضروری گھروں سے نہ نکلنے اور ٹھنڈے مشروبات کے استعمال کی درخواست کی ہے۔ محکمہ موسمیات کے مطابق آنے والے دنوں میں گرمی کی شدت میں مذید اضافہ ہوگا جبکہ گرمی کی حالیہ لہر 16 مئی تک برقرار رہ سکتی ہے۔
چیف میٹرولوجسٹ ڈاکٹر سردار سرفراز کے مطابق دادو، لاڑکانہ، سکھر میں پارہ 47 سے 49 ڈگری سینٹی گریڈ تک ریکارڈ کیا گیا، جیکب آباد میں درجہ حرارت 49 ڈگری سینٹی گریڈ تک پہنچ گیا۔
چیف میٹرولوجسٹ کے مطابق حیدرآباد، میرپورخاص، بدین، عمرکوٹ میں پارہ 44 سے46ڈگری سینٹی کے درمیان ریکارڈ کیا گیا۔
