-
-
پاکستان سپورٹس بورڈ کے زیر اہتمام تین روزہ پی ایس بی ریفریشر کوچنگ کورس کل سے کراچی میں شروع ہورہا ہے۔ شرکاء کو کوچنگ اور ٹریننگ کے مختلف مراحل پر لیکچرز دئے جائیں گے۔
تفصیلات کے مطابق پاکستان اسپورٹس بورڈ کے زیراہتمام کل بروز جمعہ 9 جون کو پاکستان اسپورٹس بورڈ کوچنگ سینٹر کراچی میں ریفریشر کوچنگ کورس کا انعقاد کیا جائے گا۔
کورس کے شرکا کو پاکستان اسپورٹس بورڈ کے ڈپٹی ڈائریکٹر جنرل شاہد اسلام اور ورلڈ اتھلیٹکس لیول ٹو لیکچرار و پاکستان اسپورٹس بورڈ کے انسٹرکٹر نصراللہ رانا کے علاوہ دیگر مقررین کھیلوں کے حوالے سے مختلف امور پر لیکچرز دیں گے۔
ماہرین کوچنگ اور ٹریننگ کے نظریات،غذائیت، ڈوپنگ، کھیلوں کی نفسیات، کھیلوں کے دوران زخم، چوٹیں اور ابتدائی طبی امداد اور ہنر کی تعلیم پر لیکچرز دیں گے ۔
کوچنگ ریفریشر کورس تین روز تک جاری رہے گا۔ پاکستان اسپورٹس بورڈ کے ڈپٹی ڈائریکٹر جنرل شاہد اسلام نے بتایا کہ اس سے قبل اسلام آباد، لاہور،فیصل آباد اور پشاورمیں بھی کورسز منعقد ہو چکے ہیں۔
پاکستان اسپورٹس بورڈ کے زیراہتمام کوچنگ ریفریشر کورسز راولاکوٹ (آزاد جموں وکشمیر) اور کوئٹہ میں بھی ہونگے۔ جن کی تاریخ کا اعلان بعد میں کیا جائے گا۔
