-
-
کراچی کے علاقے لیاقت آباد میں 22 دن کی بچی کو قتل کرنے والی ملزمہ ماں کو جوڈیشل مجسٹریٹ سینٹرل کے سامنے پیش کردیا گیا۔ ملزمہ نے عدالت کے سامنے بھی اعتراف جرم کرلیا۔
عدالت نے ملزمہ کو جوڈیشل ریمانڈ پر جیل بھیجنے کا حکم دیتے ہوئے تفتیشی افسر کو آئندہ سماعت پر کیس کا چالان پیش کرنے کی بھی ہدایت کردی۔
واضح رہے پولیس نے 22 دن کی بچی کو قتل کرنے والی ملزمہ ماں کو گرفتار کرکے آلہ قتل بھی برآمد کرلیا تھا۔ ملزمہ عمیمہ نے بچی کو قتل کرنے کا اعتراف بھی کرلیا تھا۔
ملزمہ کا کہنا ہے کہ بچی رات کو سونے نہیں دیتی تھی جس پر شوہر سے جھگڑا رہتا تھا، واقعے کو ڈکیتی کا رنگ دینے کیلئے گھر میں سامان بکھیر دیا تھا۔
پولیس کا کہنا ہے کہ 22 دن کی بچی کی لاش 10 مارچ کو گھر سے برآمد ہوئی تھی، ملزمہ نے گھر میں ڈکیتی کی اطلاع دے کر بے ہوشی کا ڈرامہ بھی رچایا تھا۔
