کراچی کے علاقے کلفٹن میں واقع عبداللہ شاہ غازی مزار کے قریب تیزرفتار کار نے فٹ پاتھ پر سوئے افراد کو روند ڈالا۔ حادثے میں 6 افراد زخمی ہوئے۔ پولیس نے نوجوان کار ڈرائیور کو گرفتار کرلیا۔
رپورٹس کے مطابق عبداللہ شاہ غازی مزار کے قریب آج صبح پیش آنے والے واقعے میں 6 افراد زخمی ہوئے جنہیں قریبی اسپتال منتقل کیا گیا۔ تمام 6 افراد کی حالت خطرے سے باہر بتائی گئی ہے۔
ایکسپریس نیوز کے مطابق حادثے میں زخمی ہونے والوں کی شناخت 8 سالہ علی رضا ولد شفیق ، 10 سالہ نساء دختر یعقوب ، 24 سالہ علی نواز ولد وکیو ، 26 سالہ کریم ولد شمار ، 55 سالہ دل نواز ولد محمد خان اور 40 سالہ سلمہٰ زوجہ شفیع کے ناموں سے کی گئی۔
حادثے کے کچھ ہی دیر بعد جائے وقوعہ سے کچھ فاصلے پر کمرشل ایریا سے پولیس نے حادثے کی ذمے دار کار میں سوار نوجوان ڈرائیور کر حراست میں لے لیا۔
ڈرائیور نے ابتدائی طور پر اپنے بیان میں پولیس کو بتایا ہے کہ وہ جس سڑک پر جا رہا تھا سامنے سے رانگ سائیڈ ایک گاڑی تیز رفتاری آرہی تھی جسے دیکھ کر وہ گھبرا گیا اور اس کی گاڑی بے قابو ہو کر فٹ پاتھ پر چڑھ گئی۔
حادثے میں لوگوں کے چیخ و پکار سن کر وہ گھبرا گیا اور اس نے وہاں سے راہ فرار اختیار کی تاہم کچھ ہی فاصلے پر وہ رک گیا تھا۔ پولیس کے مطابق گاڑی کے ڈرائیور نے حادثے کی ذمے داری بھی قبول کرلی۔
