میئر کراچی کیلئے پاکستان پیپلزپارٹی کے امیدوار مرتضیٰ وہاب اور جماعت اسلامی کے حافظ نعیم الرحمان سمیت دیگر افراد کے کاغذات نامزدگی منظور ہوگئے۔
میئر اور ڈپٹی کے انتخابات میں کاغذات کی جانچ پڑتال کے دوران پیپلزپارٹی کے امیدوار برائے میئر بیرسٹر مرتضی وہاب اور ان کے کورنگ امیدوار نجمی عالم کے کاغذات درست قرار پائے ہیں۔ میئر کراچی کیلئے جماعت اسلامی کے امیدوار حافظ نعیم الرحمان کے کاغذات نامزدگی بھی منظور کرلیے گئے ہیں۔
ڈپٹی میئر کراچی کیلئے پیپلزپارٹی کے امیدوار عبداللہ مراد اور جماعت اسلامی کے سیف الدین ایڈووکیٹ، قاضی صدرالدین اور جنید مکاتی کے بھی کاغذات درست قرار دیے گئے ہیں۔
رہنما پیپلز پارٹی مرتضیٰ وہاب کہتے ہیں عوام کا مینڈیٹ آچکا ہے، ہمیں مل کر کام کرنے کی کوشش کرنی چاہئے، انہوں نے واضح کیا کہ سندھ حکومت کا کوئی بھی ادارہ الیکشن پر اثرانداز نہیں ہوگا۔
امیر جماعت اسلامی کراچی حافظ نعیم کا کہنا تھا کہ جماعت اسلامی کو کراچی نے سب سے زیادہ ووٹ دیئے، لیکن اب عوام کے مینڈیٹ پر قبضہ کرنے کی کوشش کی جارہی ہے، گزشتہ روز بھی کچھ چیئرمین لاپتا ہوئے۔
میئرکراچی کیلئے انتخاب 15 کو ہوگا جسکے لئے الیکشن کمیشن نے تیاریاں شروع کردی ہیں۔ کراچی میونسپل کارپوریشن کے سٹی کونسل ہال میں میئرکراچی کا انتخاب ہوگا۔ بلدیہ عظمیٰ کے انتخابات میں منتخب ہونے والے نمائندے میئر کراچی کو منتخب کریں گے۔ میئر کراچی کا انتخاب شو آف ہینڈ کے ذریعے کیا جائے گا۔
