گزشتہ ماہ کراچی کے علاقہ الفلاح سے لاپتہ ہوکر پاک پتن سے ملنے والی دعا زہرا کے والد بیٹی کی بازیابی کیلئے سندھ ہائی کورٹ پہنچ گئے۔ دعا زہرا کے والد نے بیٹی کی بازیابی کیلئے عدالت میں درخواست دائر کردی۔
دعا زہرا کے والد نے سندھ ہائیکورٹ میں درخواست دائر کی جس میں مؤقف اختیار کیا گیا ہےکہ 16 اپریل کو رات ساڑھے بارہ بجےاہلیہ نے بتایا کہ دعا زہرا لاپتہ ہے جس کے بعد الفلاح تھانے جاکر دعا زہرا کے اغواکا مقدمہ نامعلوم افراد کے خلاف درج کرایا، کیس کے تفتیشی افسر نے مقدمے کا چالان تاحال جوڈیشل مجسٹریٹ کی عدالت میں پیش نہیں کیا۔
دعا زہرا کے والد کی جانب سے دائر درخواست میں کہا گیا ہے کہ ایس ایس پی ایسٹ،ایس ایچ اوالفلاح اور تفتیشی افسر کودعا زہرا کو بازیاب کرانے کا حکم دیاجائے۔
درخواست میں استدعا کی گئی ہے کہ تفتیشی افسر دعا زہرا کو ظہیر احمد سے بازیاب کراکے عدالت میں پیش کریں، دعا زہرا اور اسکی فیملی کو تحفظ فراہم کیا جائے۔دعا زہرا اور ظہیر احمد کی 17 اپریل کو ہونے والی شادی بھی غیر قانونی قرار دی جائے۔
درخواست گزار کے مطابق سوشل میڈیا کے ذریعے پتا چلا کہ ظہیر احمد نے دعا زہرا سے شادی کرلی ہے، تاریخ پیدائش کے حساب سے نکاح کے وقت دعا زہرا کی عمر 14 سال سے کم تھی، نادرا ریکارڈ کے مطابق بھی اس کی عمر 14 سال سے کم ہے، لہٰذا دعا اور ظہیر احمد کی 17 اپریل کو ہونے والی شادی غیر قانونی قرار دی جائے۔
