آئی جی سندھ پولیس غلام نبی میمن نے شہریوں کو مشورہ دیا ہے کہ شہری خود اپنے گھروں اور کاروباری مقامات پر کیمرے نصب کروائیں۔ آئی جی سندھ کا کہنا ہے کہ کراچی میں کسی ایسے اہلکار کی پوسٹنگ نہیں کی گئی جسکے ملزمان سے رابطے ہوں۔
جیو نیوز کی رپورٹ کے مطابق آئی جی سندھ غلام نبی میمن کی زیرصدارت میں سندھ اسمارٹ سرویلنس سسٹم منصوبے پر اجلاس ہوا جس میں آئی جی سندھ نے کہا کہ سندھ کے داخلی وخارجی راستوں پر لگے مانیٹرنگ کیمروں کی حفاظت ریپڈ ری ایکشن فورس کی ہوگی۔
اس دوران پراجیکٹ مینیجر نے بتایا کہ 10مئی تک اسمارٹ سرویلنس سسٹم مکمل طورپرفعال اورپولیس کے سپرد کردیا جائے گا۔
آئی جی سندھ کا کہنا تھا کہ عوام پولیس اور قانون نافذ کرنے والے اداروں کا ساتھ دیں، شہری اپنے گھروں اور کاروباری مقامات پر کیمرے نصب کروائیں جہاں ضرورت ہو وہاں رضاکارانہ طورپر گواہی کے لیے تعاون کریں۔
اس موقع پر آئی جی سندھ نے کہا کہ سندھ پولیس کے 78 اہلکاروں کے خلاف انکوائری کی جارہی ہے، انہیں شوکاز جاری کردیے گئے ہیں کیونکہ اہلکاروں کے خلاف ملزمان کے ساتھ روابط سمیت دیگر شکایات تھیں۔
غلام نبی میمن کا کہنا تھا کہ انکوائری رپورٹ کی روشنی میں ہی مزید کارروائی کی جائے گی، ان اہلکاروں کو کراچی میں کوئی پوسٹنگ نہیں دی گئی۔
