-
-
سابق وزیراعظم، بانی چیئرمین پی ٹی آئی اور پاکستان کرکٹ ٹیم کے سابق کپتان عمران خان کو برطانیہ کی تاریخی آکسفورڈ یونیورسٹی کے چانسلر کے امیدواروں میں شامل کرلیا گیا ہے۔
برطانوی میڈیا کے مطابق کرس پیٹن کے آکسفورڈ یونیورسٹی کے چانسلر کے عہدے سے استعفیٰ دینے کے ساتھ ہی نئے چانسلر کے انتخاب کی دوڑ رات شروع ہوگئی ہے۔ ہانگ کانگ کے سابق گورنر اور ٹوری نائب وزیراعظم کرس پیٹن 21 سال تک عہدے پر براجمان رہنے کے بعد گزشتہ روز 80 سال کی عمر میں عہدے سے سبکدوش ہوگئے۔
برطانوی میڈیا کی رپورٹ کے مطابق سابق وزیراعظم تھریسا مے ایک متوقع انتخاب ہوسکتی ہیں کیوں کہ پہلے بھی اس عہدے کے لیے ان کا نام لیا جارہا تھا۔ ایک اور واضح امیدوار روری اسٹیورٹ ہیں، جن کے پاس چار انتہائی معتبر کتابوں کے مصنف کے طور پر مطلوبہ دانشورانہ قابلیت ہے۔
رپورٹ کے مطابق یونیورسٹی کے چانسلر کے عہدے کے لیے مزید وائلڈ کارڈ امیدواروں میں سابق پاکستانی وزیر اعظم اور کرکٹر عمران خان بھی شامل ہیں جنہیں حال ہی میں ان کے اپنے ملک میں قید کی سزائیں سنائی گئی ہیں، ان کا مقابلہ برطانیہ کے سابق وزرائے اعظم ٹونی بلیئر اور بورس جانسن سے ہے۔
آکسفورڈ یونیورسٹی کی چانسلرشپ ایک باوقار اور بڑی حد تک رسمی عہدہ ہے، جس کے لیے آکسفورڈ کے گریجویٹس میں سے ہی کسی کا انتخاب کیا جاتا ہے اور عام طور پر یہ عہدہ کسی سیاست دان کو سونپا جاتا ہے۔
اس سے پہلے روایتی طور پر ہونے والے انتخاب میں چانسلر کے امیدواروں کیلئے مکمل تعلیمی لباس میں شریک ہونا لازمی ہوتا تھا، تاہم اس دفعہ یونیورسٹی نے تصدیق کی ہے کہ پہلی بار عہدے کا الیکشن روایتی انداز کی بجائے آن لائن ہوگا۔
