کراچی کے علاقے کورنگی میں شادی سے ایک روز قبل فائرنگ کرکے نوجوان کو قتل کردیا گیا۔ نوجوان کے قتل پر شادی کا گھر ماتم کدہ بن گیاشادی کا گھر ماتم کدہ بن گیا۔
کراچی کے علاقے کورنگی میں دارالعلوم روڈ پر 22 سالہ نوجوان کو شادی سے ایک روز قبل فائرنگ کرکے قتل کردیا گیا۔ مقتول کی شناخت 22 سالہ اسامہ کے نام سے ہوئی جسے چار گولیاں ماری گئیں۔
پولیس نے والد کی مدعیت میں قتل کی دفعات کے تحت مقدمہ درج کرلیا ہے۔ اسامہ کی لاش گزشتہ روز عوامی کالونی کورنگی سے برآمد ہوئی تھی۔ پولیس کا کہنا ہے کہ مقتول کے دوست طلحہ کو حراست میں لیا ہے۔
ایف آئی آر میں مقتول کے والد نے پولیس کو بتایا کہ جمعے کو بیٹے کی مایوں کے لیے دلہن کے گھر جانا تھا، مقتول اسامہ کا دوست طلحہ اسے گھر لینے آیا تھا، دلہن کے گھر سے واپس آئے تو اسامہ گھر پر موجود نہیں تھا۔
والد نے بتایا کہ اسامہ کو کال کی تو نمبر بند تھا، بعدازاں پولیس کو اس کی لاش ملی، اسپتال میں لاش دیکھی تو بیٹے کو شناخت کیا۔ والد نے پولیس کو بیان دیا کہ اسامہ کو اس کا دوست طلحہ کار میں لے کر گیا تھا اور اسی نے اسامہ کو قتل کیا ہے۔
دوسری جانب پولیس نے واردات میں استعمال ہونے والی گاڑی برآمد کرلی ہے، گاڑی سے خون کے نمونے بھی حاصل کرلیے گئے ہیں۔
پولیس حکام کے مطابق طلحہ نے دیگردو ساتھیوں کے ہمراہ اسامہ کو فائرنگ کرکے قتل کیا، طلحہ حراست میں ہے جبکہ دیگر دو فرار ملزمان کی گرفتاری کی کوشش جاری ہے۔
