اسلام آباد کے بعد ملک بھر کے تمام پاسپورٹ دفاتر سے بھی ای پاسپورٹ کا اجرا شروع کر دیا گیا ہے۔ ای پاسپورٹ کے فیس شیڈول کا بھی اعلان کردیا گیا۔
پاکستان کے وفاقی دارلحکومت اسلام آباد میں رواں سال جون کے مہینے میں ای پاسپورٹ کی سہولت عوام کو فراہم کی گئی تھی اور اب ملک بھر میں پاسپورٹ دفاتر پر عوام کو یہ سہولت دستیاب ہے۔
ڈائریکٹوریٹ جنرل امیگریشن اینڈ پاسپورٹس کے مطابق ای پاسپورٹ اجرا کے لیے فیس شیڈول بھی جاری کر دیا گیا ہے۔ شیڈول کے مطابق 36 صفحات کے5 سالہ ای پاسپورٹ کے لیے نارمل فیس 9 ہزار روپے رکھی گئی ہے، جبکہ اتنے ہی صفحات کے ارجنٹ ای پاسپورٹ کی فیس 15 ہزار روپے مقرر کی گئی ہے۔
شیڈول کے مطابق 72 صفحات کے ای پاسپورٹ کے لیے نارمل فیس 16 ہزار 500 روپے اور ارجنٹ کے لیے 27 ہزار روپے فیس مقررکی گئی ہے۔
چھتیس صفحات پر مشتمل 10 سالہ پاسپورٹ کے لیے نارمل فیس 13 ہزار 5 سو روپے مقررکی گئی ہے جبکہ 36 صفحات پر مشتمل 10 سالہ پاسپورٹ کی ارجنٹ فیس 22 ہزار 500 روپے ہے۔
72 صفحات کے 10 سالہ پاسپورٹ کی نارمل فیس 24 ہزار 750 روپے جبکہ ارجنٹ کی فیس 40 ہزار 500 روپے مقرر کی گئی ہے۔ شیڈول کے تحت نارمل پاسپورٹ کی فیس حسب سابق رہے گی جبکہ یہ فیس شیڈول 16 اگست سے نافذ العمل ہوگیا ہے۔
