سرہاری ریلوے اسٹیشن نواب شاہ کے قریب ہزارہ ایکسپریس کو پیش آنے والے حادثے میں اموات کی تعداد 30 ہوگئی ہے۔ درجنوں زخمی اب بھی اسپتال میں زیرعلاج ہیں۔ ٹریک کی بحالی کا کام بھی جاری ہے۔ ڈاؤن ٹریک کو 18 گھنٹے بعد بحال کردیا گیا۔
گزشتہ روز کراچی سے روانہ ہونے والی ہزارہ ایکسپریس کو سرہاری ریلوے اسٹیشن نواب شاہ کے قریب حادثہ پیش آیا جسکے نتیجے میں ٹرین کی متعدد بوگیاں پٹری سے اترگئیں۔
ایس ایس پی سانگھڑ کا کہنا ہے کہ 10 ایس ایچ او 4 ڈی ایس پیز اور 100 سے زائد پولیس اہلکار ریسکیو کے کام میں مصروف رہے۔ پولیس ٹریننگ سینٹر کے پولیس اہلکار بھی کافی تعداد میں امدادی کام کے لیے پہنچ گئے۔
آرمی چیف نے امدادی سرگرمیوں کے لیے پاک فوج اور رینجرز کو خصوصی ہدایات بھی دیں۔ رپورٹس کے مطابق پاک فوج کا ریسکیو آپریشن آخری زخمی کی اسپتال منتقلی اور پھنسے افراد کی بحالی تک جاری رہا۔
رپورٹس کے مطابق ہزارہ ایکسپریس حادثے میں اب تک 30 اموات ہوچکی ہیں اور اب بھی کئی زخمی مختلف اسپتالوں میں زیرعلاج ہیں۔ رپورٹس کے مطابق زخمیوں کی تعداد 100 کے قریب ہے۔
دوسری جانب ریلوے ٹریک کی بحالی کا کام بھی جاری ہے اور کراچی آنے والے ڈاؤن ٹریک کو ٹرینوں کی آمدورفت کیلئے کھول دیا گیا۔ ڈاؤن ٹریک 18 گھنٹے بعد بحال کیا گیا تاہم اپ ٹریک تاحال بند ہے اور اسکی بحالی کیلئے بھی کام جاری ہے۔ رپورٹس کے مطابق اپ ٹریک بحال ہونے میں مزید 4 سے 5 گھنٹے لگ سکتے ہیں۔
