ایشین ہاکی چیمپیئنز ٹرافی میں پاکستانی ٹیم آج سے اپنی مہم کا آغاز کرے گی۔ پاکستان کا پہلا میچ ملائیشیا کے خلاف شیڈول ہے۔ ایشین ہاکی چیمپیئنز ٹرافی بھارتی شہر چنئی میں کھیلی جارہی ہے۔
پاکستان ٹیم نے ملائیشیا کے خلاف میچ سے قبل گزشتہ روز بھرپور پریکٹس کی، ٹیم کے کپتان عمر بھٹہ نے کہا کہ میچ میں کامیابی کے ساتھ ایونٹ کا آغاز کرنا چاہتے ہیں، نوجوانوں اور سینئرز کے کمبینیشن سے بہتر پلاننگ کے ساتھ اچھے نتائج دینے کی کوشش کریں گے۔
پاکستان ہاکی فیڈریشن (پی ایچ ایف) نے اولمپیئن محمد ثقلین کی بحیثیت ہیڈکوچ تقرری کے حوالے سے ٹیم مینجمنٹ کو آگاہ کردیا ہے جبکہ چیمپئنز ٹرافی کے لیے لوکل فزیو کی خدمات بھی حاصل کرلیں ہیں۔ ہاکی فیڈریشن نے شہناز شیخ کو ہیڈکوچ بنایاتھا تاہم وہ ویزا مسائل کی وجہ سے ٹیم کے ساتھ بھارت نہیں جاسکے۔
ایشین ہاکی چیمپیئنز ٹرافی کا آغاز آج سے ہی ہورہا ہے۔ پاکستان کی ٹیم پاکستانی وقت کے مطابق شام 6 بج کر 45 منٹ پر ملائیشیا کے مدمقابل ہوگی۔ ایشین ہاکی چیمپئنز ٹرافی کا افتتاحی میچ میں آج کوریا اور جاپان کی ٹیمیں ایک دوسرے سے ٹکرائیں گی جبکہ میزبان بھارت کا مقابلہ چین سے ہوگا۔
واضح رہے کہ قومی ٹیم ایونٹ میں اپنا دوسرا میچ 4 اگست کو کوریا، تیسرا میچ 6 اگست کو جاپان، چوتھا میچ 7 اگست کو چین جبکہ پانچویں میچ میں 9 اگست کو روایتی حریف بھارت کیساتھ کھیلے گا۔
