قرضہ ایپلی کیشن اسکینڈل پر وفاقی وزیر برائے انفارمیشن ٹیکنالوجی امین الحق اہم اقدامات اٹھانے کا اعلان کیا ہے۔ وفاقی وزیر آئی ٹی کی ہدایت پر غیر قانونی قرضہ ایپلی کیشنز کیخلاف سخت کارروائی کا آغاز اب تک 43 ایپس کو بلاک کر دیا گیا ہے۔
وفاقی وزیر آئی ٹی امین الحق نے اسلام آباد میں میڈیا کو غیر قانونی قرضہ ایپلیکیشنز کے خلاف حکومتی اقدامات سے آگاہ کرتے ہوئے بتایا ہے کہ غیر قانونی قرضہ ایپلی کیشن کے خلاف سخت کارروائی کا آغاز کر دیا گیا ہے اور اب تک 43 ایسی ایپلی کیشنز کو بلاک کیا جا چکا ہے۔
امین الحق نے کہا کہ چیئرمین پی ٹی اے کو ایسی تمام ایپلیکشنز کے خلاف فوری کارروائی کی ہدایت کی گئی تھی جس کے بعد پی ٹی اے اس حوالے سے سرگرم ہے۔ اس طرح کی کمپنیاں سیکیورٹیز اینڈ ایکسچینج کمیشن میں رجسٹرڈ ہوتی ہیں اس لیے پی ٹی اے کے اقدامات میں ایس ای سی پی سے بھی مشاورت اور معاونت شامل ہے۔
ان کا کہنا تھا کہ فیس بک ودیگر سوشل میڈیا پلیٹ فارمز سے قرضہ دینے والا مافیا سادہ لوح افراد کو بلیک میل کر رہا ہے۔ انہوں نے ہدایت کی کہ صارفین کی آگاہی کیلیے مہم بھی چلائی جائے تاکہ وہ بلیک میلر مافیا کا شکار نہ بن سکیں جب کہ متاثرین ایسی ایپلی کیشنز کی شکایت پی ٹی اے، ایف آئی اے سائبر کرائم اور مقامی پولیس کے پاس بھی درج کرائیں۔
دوسری جانب وفاقی وزیر نے ڈائریکٹر جنرل ایف آئی اے سے بھی رابطہ کیا اور ان کارروائیوں پر بریفنگ لی۔ اس موقع پر امین الحق نے کہا کہ عوام کی مجبوریوں کا فائدہ اٹھا کر انہیں موت کے منہ میں دھکیلنے والے عناصر کی سرکوبی ضروری ہے، اس لیے سائبر کرائم ونگ شکایات کا انتظارکرنے کے بجائےایسےعناصر کے خلاف ازخود کارروائی کرے۔
امین الحق نے مزید کہا کہ دھمکیاں، بلیک میلنگ اور صارف کا ذاتی ڈیٹا استعمال کرنا خلاف قانون ہے۔ صارفین بھی بغیر سوچے سمجھے آن لائن اور سوشل میڈیا اشتہارات سے متاثر ہوکر اپنا ذاتی ڈیٹا کسی سے شیئر نہ کریں۔ آن لائن ڈالرز کمانے کی مختلف پوسٹ پر احتیاط ضروری ہے اس لیے وہاں کوئی رقم یا معلومات فراہم نہ کی جائیں۔
واضح رہے کہ گزشتہ دنوں آن لائن قرضہ ایپ کے ذریعے معمولی قرضہ حاصل کرنے والے شخص مسعود کی قرض خواہوں کی بلیک میلنگ سے تنگ آکر خودکشی نے پورے ملک میں ہلچل مچا دی تھی جس کے بعد حکومتی سطح پر غیر قانونی طور پر آن لائن قرض دینے والوں کے خلاف کارروائی کا آغاز کیا گیا تھا۔
