ماضی میں بچوں کا مشہور مزاحیہ ڈراما عینک والا جن میں حامون جادو گر کا کردار ادا کرنے والے حسیب پاشاکا کہنا ہے کہ 90 کی دہائی کے اس ڈرامے کی ماسٹر کاپی خصوصی طور پر بلاول ہاؤس بھیجی جاتی تھی، جہاں بلاول اور بختاور بھٹو یہ ڈراما شوق سے دیکھا کرتے تھے۔
ڈان نیوز کی رپورٹ کے مطابق حسیب پاشا نے ایک پوڈکاسٹ میں شرکت کی جہاں انہوں نے اپنے مالی مسائل اور ڈرامے کی مقبولیت کے حوالے سے بات کی۔
انہوں نے انکشاف کیا کہ 90 کی دہائی میں ڈراما عینک والا جن اتنا مشہور تھا کہ اس کی ماسٹر کاپی بلاول ہاؤس بھیجی جاتی تھی، اس وقت کی وزیراعظم بے نظیر کے بچے بلاول اور بختاور بھٹو چھوٹے ہوا کرتے تھے، اور اسکول کے بعد یہ ڈراما شوق سے دیکھا کرتے تھے۔
انہوں نے کہا کہ عمران خان نے جب فنڈ ریزنگ کا کام شروع کیا تو شوکت خانم کی تعمیر کے لیے لیڈی ڈیانا آئی تھیں، اس وقت ہم نے عینک والا جن کا ڈراما پرفارم کیا تھا، یہ ہمارے لیے فخر کا مقام تھا۔
حسیب پاشا نے شکوہ کیا کہ بلاول بھٹو اور بختاور بھٹو نے بھی بڑے ہوکر انہیں بھلادیا جبکہ عمران خان نے بھی انہیں یاد نہیں رکھا۔
واضح رہے عینک والا جن 90 کی داہائی کا مشہور ترین ڈرامہ تھا جو خاص طور پر بچوں میں انتہائی مقبول تھا۔ محدود وسائل کے ساتھ پیش کیے جانے والے اس ڈرامے میں حامون جادوگر، زکوٹا اور بل بتوڑی کے گرد گھومتا اور اُن کا جادو دیکھ کر کچے ذہنوں میں گمان ہوتا کہ ضرور کہیں نہ کہیں حقیقی دنیا میں بھی طلسماتی دنیا آباد ہے یہ لوگ کہیں نہ کہیں ضرور موجود ہیں۔
