ایڈمنسٹریٹر کراچی مرتضٰی وہاب نے چڑیا گھر اور سفاری پارک کے مہاوت اور زو کیپرز کی عالمی سطح کے ماہرین سے تربیب کروانے کی ہدایت کردی ہے۔ ایڈمنسٹریٹر کراچی نے چڑیا گھر کے دوران کے دوران یہ ہدایات جاری کیں۔ تربیتی پروگرام کے دوران دیگر شہروں کے چڑیا گھر کے عملہ کو بھی مدعو کیا جائے گا۔
مرتضٰی وہاب کا کہنا تھا کہ مہاوت اور دیگر عملہ کی عالمی سطح کے ماہرین سے تربیت کروائی جائے تاکہ جانوروں کی دیکھ بھال بہتر اور عالمی معیار کے مطابق کی جاسکے۔
ایڈمنسٹریٹر کراچی کی ہدایت پر سینیئر ڈائریکٹر ریکریشن منصور قاضی نے نیشنل زولوجیکل گارڈن سری لنکا کے ماہرین سے بذریعہ ای میل رابطہ کیا اور ماہرین نے کراچی آکر مہاوت اور زو کیپرز کو تربیت دینے پر رضامندی ظاہر کردی ہے۔
میونسپل کمشنر اور ایڈمنسٹریٹر کراچی کو محکمہ جاتی منظوری کیلئے درخواست بھیج دی گئی ہے اور توقع ہے کہ جلد ہی کراچی چڑیا گھر میں سری لنکا کے ماہر ڈاکٹرز ٹریننگ کیلئے دستیاب ہوں گے۔
مذکورہ پروگرام میں اسلام آباد ، لاہور اور پشاور کے چڑیا گھروں کے مہاوت اور زو کیپرز کو بھی مدعو کیا جائے گا تاکہ وہ بھی جانوروں کی دیکھ بھال سے متعلق اس پروگرام سے مستفید ہوسکیں۔
