پاکستان کے سب سے بڑے شہر کراچی میں پولیس کے تفتیشی افسران کے لئے ایڈیشنل آئی جی غلام نبی میمن نے بڑا فیصلہ کرلیا۔ پولیس کا تفتیشی افسر اب لگژری کار میں سفر کرے گا جسکا بل محمکہ ادا کرے گا۔ کراچی پولیس نے آن لائن ٹرانسپورٹ کمپنی سے معاہدہ کرنے کا فیصلہ کرلیا۔
اے آر وائی نیوز کی رپورٹ کے مطابق کراچی پولیس نے آن لائن ٹرانسپورٹ کمپنی سے معاہدے کا فیصلہ کیا ہے، آن لائن کار کمپنی سے معاہدے کے لیے کمیٹی قائم کی گئی ہے۔
کراچی پولیس کے ایڈیشنل انسپکٹر جنرل (آئی جی) غلام نبی میمن کا کہنا ہے کہ تفتیشی افسر کو روزانہ کی بنیاد پر عدالت آنا جانا ہوتا ہے، کیسز کی جانچ کے لیے وقوعہ اور فرانزک لیبارٹری جانا ہوتا ہے۔
غلام نبی میمن کا کہنا تھا کہ عدالت آنے اور جانےمیں خرچہ ہوتا ہے تاہم ملزمان کو عدالت لانے اور لے جانے کے لیے یہ سہولت نہیں ہوگی۔
انہوں نے کہا کہ پولیس بجٹ شعبہ تفتیش کے لیے مختص ہوتا ہے، تاہم اسی کوسٹ آف انویسٹی گیشن سے نجی ٹرانسپورٹ کمپنی کو معاوضہ دیا جائے گا، کوشش ہے جلد کسی کمپنی سے معاہدہ کریں۔
ماضی میں بھی کراچی میں ٹریفک پولیس اہلکاروں کو روایتی موبائل گاڑی کے علاوہ لگژری گاڑیاں دی جاچکی ہیں۔ کراچی کے پوش علاقے ڈیفنس میں پیٹرولنگ کرنے والے ٹریفک پولیس اہلکار لگژری گاڑیوں میں ہی گشت کرتے ہیں۔
