ایوان صدر اسلام آباد میں یوم پاکستان کے موقع پر سول اعزازات دینےکی تقریب ہوئی جس میں مختلف شعبوں میں گراں قدر خدمات سر انجام دینے پر مختلف شخصیات کو اعزازات سے نوازا گیا۔ پنجاب، بلوچستان اور خیبرپختونخوا کے گورنر ہاؤس میں بھی اعزازات دینے کی تقاریب ہوئیں۔
گورنرسندھ کامران ٹیسوری کو نشان امتیاز سے نوازا گیا۔ معروف اداکار بہروز سبزواری، میزبان اور گلوکار فخر عالم اور پاکستان کرکٹ ٹیم کےکپتان بابراعظم بھی اعزاز پانے والوں میں شامل ہیں۔
اسکواش کے میدان میں اپنے فن کا لوہا منوانے والے عظیم کھلاڑی جہانگیر خان اور اور ان کے ہم عصر جان شیر خان کو صدر پاکستان عارف علوی نے تمغہ امتیاز سے نوازا۔
مرحوم شاعر اور ادیب امجد اسلام امجد کا ایوارڈ ان کے بیٹے نے وصول کیا، سینیئر صحافی مجیب الرحمان شامی، جاوید چوہدری اور ندیم ملک بھی ایوارڈ حاصل کرنے والوں میں شامل ہیں۔
مشہور شاعر ساغر صدیقی کو بھی ستارہ امتیاز بعد از وفات دیا گیا، ان کا ایوارڈ سیکرٹری وزارت قومی ورثہ نے وصول کیا۔ پی کے ایل آئی کے بورڈ آف گورنرز کے چیئرمین ڈاکٹر سعید اختر اور معروف سماجی رہنما رمضان چھیپا کو بھی اعزاز سے نوازا گیا۔
ان کے علاوہ عوامی خدمات کے اعتراف میں سرتاج عزیز، میر حاصل بزنجو، رئیس الاحرار، چوہدری غلام عباس خان مرحوم، جسٹس ریٹائرڈ رانا بھگوان داس (آنجہانی) کو اور احمد غلام علی چھاگلہ (مرحوم) کو موسیقی کے فن میں نشان امتیاز سے نوازا گیا۔
صوفی غلام مصطفی تبسم (مرحوم) کو شاعری، محمد قوی خان کو ڈرامہ، فلم اور اسٹیج اداکاری میں کارہائے نمایاں سرانجام دینے پر نشان امتیاز سے نوازا گیا۔
صدر مملکت نے عامر نواز خان شہید ، محمد کامران شہید ، کرنل ریٹائرڈ محمد عارف ، محمد عثمان شہباز، ڈاکٹر کامران احمد، شیر احمد (فیصل بلوچ) ، تنویر حسین، امجد احمد ، مظہر نوازشیخ ، بشیر احمد بروہی ، فرنٹیئر کانسٹیبلری کے ذیشان احمد ، نوید احمد تمغہ شجاعت حاصل کرنے والوں میں شامل ہیں۔
