صوبائی وزیر اطلاعات و ٹرانسپورٹ سندھ شرجیل میمن کا کہنا ہے کہ کراچی میں ٹرانسپورٹ کی بہتری کیلئے کام کررہے ہیں۔ سڑکوں پر بھی کام جاری ہے۔ شہر میں جلد الیکٹرک گاڑیوں کا پروگرام متعارف کروائیں گے۔
صوبائی وزیر شرجیل انعام میمن ریڈ لائن کے کاموں کا جائزہ لینے جناح اینیو پہنچے۔ میڈٰیا سے گفتگو میں شرجیل میمن کا کہنا تھا کہ 22 کلومیٹر کا یہ پروجیکٹ ہے اور بی آر ٹی ریڈ لائن بس سروس کا کام تیزی سے چل رہا ہے۔
شرجیل انعام میمن نے کہا کہ کراچی کیلئے الیکٹریکل وہیکلز کا پروگرام شروع کرنے جارہے ہیں، الیکٹریکل وہیکلز کو ٹیکسی سروس کے طور پر شروع کرینگے۔
صوبائی وزیر کا کہنا ہے کہ الیکٹرک ٹیکسی سروس سستی اور ماحول دوست ہوگی، نجی آن لائن ٹیکسی سروس شہریوں کو مہنگی پڑرہی ہے، کراچی کے بعد دیگر شہروں میں بھی الیکٹرک ٹیکسی سروس شروع کرینگے۔
شرجیل میمن نے بتایا کہ کراچی میں بلین روپے کے ٹرانسپورٹ کے پروجیکٹ پر کام کیا جارہا ہے، ہم بس سروس کے ساتھ سڑکوں پر بھی کام کر رہے ہیں۔
صوبائی وزیر نے کہا کہ ورلڈ بینک کے ساتھ یلولائن پروجیکٹ پر کام ہورہا ہے، یلولائن پروجیکٹ کے انفرا اسٹرکچر پر جلد کام شروع ہوجائے گا۔ کراچی میں ٹرانسپورٹ کے متعدد منصوبوں پر کام کررہے ہیں، سندھ ماس ٹرانزٹ اتھارٹی پروجیکٹس کو دیکھ رہی ہے۔
انہوں نے کہا کہ وزیراعظم سے بات کر کے کے سی آر کو بھی سی پیک میں شامل کرادیا، عوام کا حق ہے کہ انہیں بہترین ٹرانسپورٹ ملے۔ پیپلزپارٹی ٹرانسپورٹ کی سہولت کیلئے اقدامات کررہی ہے، ہم سستا ٹرانسپورٹ کا نظام لانے کے لئے کوشاں ہیں۔
