پاکستان کے سب سے بڑے شہر کراچی میں بڑھتے ہوئے اسٹریٹ کرائم کے باوجود کراچی پولیس چیف ایڈیشنل آئی جی جاوید عالم کا کہنا ہے کہ شہر میں جرائم کی وارداتوں میں کمی آئی ہے۔
جیو نیوز کی رپورٹ کے مطابق کراچی چیمبر آف کامرس میں تقریب سے خطاب میں ایڈیشنل آئی جی جاوید عالم اوڈھو تاجروں پر ہی برہم ہوگئے اور انہیں ہی شہر میں سرمایہ کاری نہ ہونے کا ذمہ دار ٹھہرادیا۔
جاویدعالم اوڈھو کا کہنا تھا کہ تاجر واویلا کرتے ہیں اور سنسنی پھیلاتے ہیں، پھر کہتے ہیں سرمایہ کاری نہیں ہوتی، لاہور اور دیگر شہروں میں جرائم کی شرح زیادہ ہے۔
کراچی پولیس چیف نے کہا کہ کراچی والے اپنے دشمن خود ہیں، شہری اور بزنس کمیونٹی واقعات میڈیا میں لاکر شور کرتے ہیں، میڈیا اور تاجر ٹی وی پر آکر جرم کی باتیں کریں گے تو شہر میں سرمایہ کاری کون کرے گا۔
اے آئی جی جاوید عالم اوڈھو نے کہا کہ سی پی ایل سی کے مطابق کراچی میں کرائم کے واقعات کم ہوئے ہیں، صرف ستمبر کے ماہ میں وارداتیں بڑھی ہیں۔ پچھلے برس 18ہزار گاڑیاں چھینی یا چوری ہوئیں، اس سال تعداد 13 ہزار ہے۔
جاوید اوڈھو نے کہا کہ سیف سٹی منصوبہ شہر کی ضرورت ہے، سیلاب متاثرین کو کنٹرول نہ کیا تو مشکلات بڑھیں گی، بزنس کمیونٹیز کمانڈ اینڈ کنٹرول سینٹرز کو فروغ دیں۔
کراچی پولیس چیف ایڈیشنل آئی جی جاوید عالم اوڈھو نے کہا کہ ہم نے بہت جگہ کیمرا سسٹم لگائے جس سے صورت حال بہتر ہوئی ہے۔
