وزیراطلاعات سندھ شرجیل میمن کا کہنا ہے کہ کراچی کے 95 فیصد علاقوں سے بارش کے بعد جمع ہونے والے پانی کی نکاسی کردی گئی ہے۔ دیگر علاقوں سے بھی آج پانی نکال دیا جائے گا۔
صوبائی وزیر اطلاعات شرجیل انعام میمن نے انکشاف کیا کہ کراچی میں کچھ علاقوں میں بادل پھٹے اور دو روز کے دوران 400 ملی میٹر بارش ہوئی، بارشوں کے بعد سڑکوں پر پانی تھا تاہم سندھ حکومت نے قدرتی نکاسی اور پمپنگ کے ذریعے پانی نکال دیا ہے۔
شرجیل میمن کا کہنا ہے کہ اس وقت کراچی کی 95 فیصد سڑکیں کلیئر ہوچکی ہیں، ، اولڈ سٹی ایریا میں مسئلہ ہے، کسٹم ہاؤس پر پمپنگ کا عمل جاری ہے، اولڈ سٹی ایریا کو بھی آج کلیئر کردیا جائے گا۔
ان کا کہنا تھا کہ سمندر میں ہائی ٹائیڈ کی وجہ سے بھی پانی کی نکاسی میں رکاوٹ ہوئی تاہم امدادی سرگرمیوں کی وزیر اعلیٰ سندھ خود نگرانی کر رہے ہیں اور پوری مشینری موجود ہے، صوبائی وزرا، ایڈمنسٹریٹر کراچی سڑکوں پر موجود رہے۔
شرجیل میمن کا کہنا تھا نالوں میں بھوریاں اور سیمینٹڈ بلاکس ڈالے گئے تھے، کراچی میں بارشوں کے دوران جو جانی نقصان ہوا اس کی ذمے دار کے الیکٹرک ہے۔
کراچی میں تباہی جو مصطفیٰ کمال کے دور میں ہوئی اس کی مثال نہیں ملتی، ان کے دور میں 200 لوگ مارے گئے، وہ جتنا بھی پروپیگنڈا کرلیں فرق نہیں پڑتا۔
صوبائی وزیر نے کہا کہ ایم کیو ایم اتحادی ہے اور ہمیں اس کا بڑا احترام ہے، ہم پوری رات جاگتے رہے لیکن ہم نے کسی پر احسان نہیں کیا کیونکہ شہریوں کی خدمت ہماری ذمے داری ہے
