-
-
کراچی کو محفوظ شہر بنانے کیلئے سیف سٹی پروگرام میں تیزی آگئی۔ کراچی سیف سٹی منصوبہ فائنل کرلیا گیا۔ منصوبے کے تحت شہر بھر میں 12 ہزار کیمرے نصب کئے جائیں گے۔
کراچی سیف سٹی منصوبے کے ڈائریکٹر جنرل مقصود میمن نے جیو نیوز سے گفتگو کرتے ہوئے بتایا کہ ہے کہ تمام تیاریاں مکمل کرلی گئی ہیں۔ سیف سٹی منصوبے کو فائنل کرلیا گیا اور آئند چند دنوں میں اسکا آغاز کردیا جائے گا۔
سیف سٹی پروگرام کے تحت شہر میں 12 ہزار جدید ترین کیمرے لگیں گے، پہلے مرحلے میں 6 ہزار کیمرے دسمبر تک کام شروع کر دیں گے اور مزید 6 ہزار کیمرے اگلے سال فعال ہوجائیں گے۔
ڈی جی سیف سٹی نے کہا کہ کراچی ائیرپورٹ، ریلوے اسٹیشنز، انٹرسٹی بس ٹرمینلز، بس اسٹاپس، گرین لائن، اورنج لائن اور شہر میں چلنے والی جدید ٹرانسپورٹ میں لگے کیمروں کو بھی سیف سٹی پروگرام سے منسلک کیا جائے گا۔
مقصود میمن کا کہنا ہے کہ سیف سٹی پروگرام کے تحت صرف کیمرے ہی نہیں لگا رہے اس کے ساتھ آرٹیفیشل انٹیلی جنس کی وہ ٹیکنالوجی استعمال کر رہے ہیں جو دنیا میں ٹاپ آف دی لائن ہے ہر ایک کیمرے کے پیچھے جدید سافٹ ویئر کام کر رہا ہوگا۔
مقصود میمن کا کہنا تھا کہ کہیں اگر کسی کا چہرہ نظر آتا ہے تو اسے شہر بھر میں ٹریک کر سکیں گے کہ وہ اس سے پہلے یا بعد میں کہاں کہاں رہا ہے۔
اسی طرح اگر کوئی گاڑی گزرتی ہے تو اسے بیک اینڈ سے ٹریس کر سکیں گے کہ وہ گاڑی کہاں سے نکلی اور کہاں کہاں موجود رہی، اس سے ہمیں اسٹریٹ کرائم یا دیگر جرائم کو روکنے اور اس کا سراغ لگانے میں بھرپور مدد ملے گی۔
کراچی سیف سٹی پروگرام کے ڈی جی مقصود میمن نے بتایا کہ وزیراعلیٰ سندھ مراد علی شاہ اور دیگر حکام نے بہت کاوشیں کی ہیں، این ای ڈی یونیورسٹی کے تعاون سے منصوبے کو ٹیکنالوجی سے بہتر کیا گیا ہے۔
سیف سٹی پروگرام کے تحت کراچی کے تمام زون، تمام انٹری ایگزیٹ پوائنٹس، شاپنگ سینٹرز، بزنس ایریاز کو ان کیمروں سے کور کریں گے۔
مقصود میمن کا کہنا تھا کہ منصوبہ بندی کے تحت شہر میں 10ہزار کیمرے 3 سال میں لگائے جانے تھے، مجھے یہ منصوبہ رواں سال جنوری میں ملا، ہم نے مزید 2 ہزار کیمروں کا اضافہ کیا ہے اور ایک سال بچایا ہے، اس منصوبے کو 2 سال میں مکمل کرنے کی کوشش کریں گے۔
دو سال کے اندر اسٹیٹ آف دی آرٹ انٹی گریٹ کمانڈ اینڈ کنٹرول روم کے ساتھ کام شروع کردیں گے، اس پروگرام کے لیے سندھ حکومت نے فنڈز جاری کر دیے ہیں اور جولائی کے وسط میں کام شروع ہو جائے گا۔
