واپڈا کی جانب سے گریٹر کراچی واٹر سپلائی اسکیم کے فور پراجیکٹ کے پہلے مرحلے کی تعمیرکیلئے 98 ارب 50 کروڑ روپے مالیت کے تین مزید کنٹریکٹس سائن کرلئے گئے۔
روزنامہ جنگ کی رپورٹ کے مطابق کنٹریکٹ پر دستخط کرنے کی تقریب واپڈا میگا ہائیڈل کمپلیکس میں ہوئی۔ مہمانِ خصوصی وفاقی وزیر برائے آبی وسائل سید خورشید احمد شاہ بھی اس موقع پر موجود تھے۔
چیئرمین واپڈا نوید اصغر چودھری بھی معاہدے پر دستخط کے وقت موجود تھے۔ واپڈا کی جانب سے جنرل منیجر (پراجیکٹس) عامر مغل اور کنٹریکٹ حاصل کرنے والی تعمیراتی کمپنیوں کے مجاز نمائندوں نے کنٹریکٹس کے مسودوں پر دستخط کئے۔
اِس موقع پر خورشید احمد شاہ نے کہا کہ کے فور پراجیکٹ کراچی شہر کے لئے لائف لائن کی حیثیت رکھتا ہے۔ جس سے شہر میں پینے کے پانی کی فراہمی کا اہم مسئلہ حل کرنے میں مدد ملے گی۔
اُنہوں نے منصوبے پر ہونے والی پیش رفت پر اطمینان کا اظہار کیا اور کہااُمید ہے کہ کے فور منصوبہ مقررہ مدت میں مکمل ہوگا۔ کے فور پراجیکٹ کے پہلے مرحلے کی تکمیل سے کراچی شہر کو یومیہ 260 ملین گیلن پینے کا پانی میسر آئے گا۔
