پاکستان کے سب سے بڑے شہر کراچی کے شہریوں کو بجلی اور پانی سمیت درپیش مسائل کے حل اور حقوق کے حصول کیلئے جماعت اسلامی کل بروز اتوار 29 مئی کراچی کارواں نکالے گی۔
امیرجماعت اسلامی کراچی حافظ نعیم الرحمان نے کہا ہےکہ جماعت اسلامی کے تحت اتوار29 مئی کو مزار قائد سے شروع ہونے والا کراچی کارواں تاریخی ہوگا اور ساڑھے تین کروڑ عوام کے حقوق کے حصول کا نقطہ آغاز ثابت ہو گا۔
امیرجماعت اسلامی کے مطابق کراچی کارواں کا آغاز سہ پہر4 بجے مزار قائد سے ہوگا جو لسبیلہ، گلبہار، ناظم آباد، نارتھ ناظم آباد، نارتھ کراچی، ناگن چورنگی،پاور ہاؤس چورنگی، کے فورچورنگی، سندھی ہوٹل، شفیق موڑ، سہراب گوٹھ اور فیڈرل بی ایریا سے ہوتا ہواسپر مارکیٹ لیاقت آباد پرختم ہوگا۔
حیدری اور لیاقت آباد سپر مارکیٹ پر بڑے جلسہ عام ہوں گے، حافظ نعیم الرحمان نے اپیل کی کہ کراچی کے عوام کارواں میں اپنی فیملی کے ہمراہ شریک ہوں۔
حقوق کراچی کارواں کے اختتام پر آئندہ کےلائحہ عمل کا اعلان کیا جائے گا،حکومت اور اپوزیشن پارٹیوں کی جانب سے بلدیاتی انتخابات سے فرار کے راستے اختیار کیے جارہے ہیں۔
امیرجماعت اسلامی کراچی نے کہا کہ ہمارا واضح موقف ہے کہ بلدیاتی انتخابات اپنی مقررہ تاریخ پر ہونے چاہئیں حکومت نے پیٹرولیم مصنوعات میں 30روپے اضافہ کر کے عوام پر پیٹرول بم گرایا ہے یہ اضافہ کسی صورت قابل قبول نہیں، اسے فوری طور واپس لیا جائے۔
