-
-
حکومت سندھ نے گاڑیوں کی رجسٹریشن اور نئی اجرک ڈیزائن والی نمبر پلیٹس لگانے کی حتمی تاریخ میں ایک ماہ کی توسیع کا فیصلہ کرلیا ہے۔ ذرائع کے مطابق اب گاڑی مالکان 3 مئی 2025ء تک نئی نمبر پلیٹس حاصل کرسکیں گے۔ قبل ازیں آخری تاریخ 3 اپریل 2025ء مقرر کی گئی تھی۔
ذرائع کا کہنا ہے کہ عیدالفطر کی تعطیلات کے باعث نوٹیفکیشن جاری نہیں ہوسکا، تاہم آئندہ دو روز میں سرکاری طور پر توسیع کا اعلامیہ جاری کردیا جائے گا۔
واضح رہے کہ حکومت نے صوبے بھر میں جدید سیکیورٹی فیچرز سے لیس اجرک ڈیزائن والی نمبر پلیٹس کے استعمال کو لازمی قرار دیا ہے۔
نئی تاریخ کے بعد پرانی نمبر پلیٹ والی گاڑیاں ضبط کی جائیں گی اور مالکان کو جرمانے کا سامنا بھی کرنا پڑے گا۔
محکمہ ایکسائز ذرائع کے مطابق سندھ میں چھوٹی اور بڑی گاڑیوں کی مجموعی تعداد تقریبا 70 لاکھ کے قریب پہنچ چکی ہے، صوبے میں گاڑیوں کو نئی نمبر پلیٹس کے نظام میں لانا حکومتی پالیسی کا اہم حصہ ہے۔
