یوایس کرکٹ کونسل کے محمدافضل قریشی نے پاکستانی کرکٹرز کے لئے یوایس اوپن کرکٹ پریمیئرلیگ کے ٹرائلز کا اعلان کیا ہے۔ کھلاڑیوں کے انتخاب کے لئے ٹرائلز 7 نومبر کو دوپہر 2 بجے کراچی کے ٹی ایم سی گراؤنڈ پر منعقد ہوں گے۔
سابق پاکستانی کرکٹر شعیب محمد اور فیصل اقبال ٹرائلز میں کھلاڑیوں کی صلاحیتوں کو جانچیں گے اور ان ٹرائلز سے کھلاڑیوں کا انتخاب کریں گے۔ رجسٹریشن کے عمل کے بعد تین مراحل میں سلیکشن کیا جائے گا، جس میں پہلے کراچی میں ٹرائلز ہوں گے، اس کے بعد کوالیفائنگ راؤنڈ اور آخر میں حتمی انتخاب ہوگا۔
محمدافضل قریشی کے مطابق ٹرائلز کے ذریعے منتخب ہونے والے کھلاڑیوں کو امریکا میں ہونے والی یوایس اوپن کرکٹ پریمیئرلیگ میں شرکت کا موقع ملے گا۔ یوایس اوپن کرکٹ پریمیئرلیگ 14 سے 21 دسمبر تک امریکا میں منعقد ہوگی جس میں دنیا بھر سے کھلاڑی شریک ہوں گے۔
امریکی کرکٹ کونسل کے میڈیا کوآرڈینیٹر کاشف احمدفاروقی کے مطابق ہ ٹرائلز پاکستانی کھلاڑیوں کے لیے اپنی صلاحیتوں کو منوانے اور عالمی سطح پر کھیلنے کا ایک اہم موقع ہیں۔ منتظمین کے مطابق امیدواروں کے پاس ایک درست امریکی ویزا ہونا ضروری ہے۔ کھلاڑی www.cricketusopen.com پر جا کر رجسٹریشن کروا سکتے ہیں جبکہ اس سلسلے میں کرکٹ کونسل یوایس اے کے سوشل میڈیا ہینڈلز پر بھی اپ ڈیٹس دستیاب ہوں گی۔
