کراچی کے علاقے گلشن اقبال میں عزیز بھٹی پارک کے قریب جھاڑیوں میں لگی آگ نے نظارت میں رکھی سیکڑوں موٹر سائیکلوں اور گاڑیوں کو لپیٹ میں لے لیا۔
خوفناک آتشزدگی کے باعث نظارت میں رکھی گئیں کیس پراپرٹیز کی 500 سے زائد موٹر سائیکلیں، بس، رکشے اور کئی گاڑیاں جل کر خاکستر ہو گئیں۔
فائیر بریگیڈ حکام کا کہنا ہے کہ آگ پر قابو پالیا گیا تاہم گاڑیوں کے ٹائر جلنے کے باعث دھواں زیادہ اٹھ رہا ہے، فائر بریگیڈ کی 6 گاڑیوں نے آگ بجھانے کے عمل میں حصہ لیا۔
حکام کے مطابق آگ کو بجھانے کے بعد کولنگ کا عمل جاری ہے۔ بروقت اقدام سے قریب موجود فلیٹوں کو آگ سے محفوظ رکھا گیا۔۔
حکام کا بتانا ہے کہ نظارت میں آتشزدگی کے باعث 500 سے زائد موٹر سائیکلیں، ایک بس، دو رکشے اور 6 سے7 گاڑیاں مکمل طور پر جل کر خاکستر ہو گئی ہیں۔
نظارت وہ جگہ ہوتی ہے جہاں کیس پراپرٹیز میں پھنسا سامان مثلاً موٹر سائیکل، بس، ٹرک، گاڑیاں اور رکشے اور دیگر سامان لا کر رکھا جاتا ہے اور بوقت ضرورت اسے عدالت میں پیش کیا جاتا ہے۔
