سندھ ہائی کورٹ میں جسٹس سید حسن اظہررضوی کی سربراہی میں 10 رکنی بینچ کے سامنے سپر ہائی وے پر نجی اراضی پر مویشی منڈی لگانے کے خلاف درخواست کی سماعت ہوئی۔ کنٹونمنٹ بورڈ ملیر کے جواب پر درخواست گزار نے عدم اطمینان کا اظہار کردیا۔
سماعت کے دوران پاکستان نیوی نان گیزیٹیڈ سویلین ایمپلائز سوسائٹی کی درخواست پر کنٹونمنٹ بورڈ ملیر نے حلفیہ بیان جمع کروادیا۔ جواب میں کنٹونمنٹ بورڈ ملیر نے آئندہ درخواست گزار کی اراضی پر مویشی منڈی نہ لگانے کی یقین دہانی کروائی۔
کنٹونمنٹ بورڈ ملیر کے جواب پر درخواست گزار وکیل نے عدم اطمینان کا اظہار کیا۔ درخواستگزار کے وکیل نے موقف دیا کہ یہ چیف ایگزیکٹو یا صدر کنٹونمنٹ کی جانب سے حلف نامہ نہیں۔ صدر یا چیف ایگزیکٹو کو خود اپنا حلف نامہ جمع کرانے کی ہدایت کی جائے۔
عدالت نے درخواست گزار کے وکیل کو تحریری طور پر جواب جمع کرانے کا حکم دیدیا اور سماعت 2 ہفتوں کے لیے سماعت ملتوی کردی۔
واضح رہے کہ درخواست میں موقف اپنایا گیا تھا کہ سپر ہائی وے پر ان کی اراضی پر ہر سال زبردستی مویشی منڈی لگا دی جاتی ہے۔ گزشتہ 6 سال سے کنٹونمنٹ کیخلاف فیصلہ ہو رہا ہے مگر عمل نہیں۔
