مہنگائی سے پریشان کراچی کے شہریوں کیلئے راحت کی خبر آگئی۔ نیپرا نے کے الیکٹرک صارفین کیلئے فیول ایڈجسٹمنٹ کی مد میں بجلی سستی کرنے کا اعلان کردیا۔ نوٹی فکیشن بھی جاری کردیا گیا۔
نیپرا نے ستمبر کی فیول ایڈجسٹمنٹ کی مد میں کراچی کے شہریوں کیلئے بجلی 5 روپے 13 پیسے فی یونٹ سستی کرنے کا نوٹی فکیشن جاری کیا ہے۔
نوٹی فکیشن کے مطابق بجلی کی قیمتوں میں کمی کا اطلاق نومبر کے بلوں میں ہوگا۔ بجلی کی قیمت میں کمی کے بعد کراچی کے صارفین کو تقریبا 8 ارب 50 کروڑ روپےکا ریلیف ملے گا۔
نیپرا کا کہنا ہےکہ کے الیکٹرک نے4 روپے 62 پیسے فی یونٹ کمی کی درخواست کی تھی اور اس بنیاد پر اتھارٹی نے 25 اکتوبر 2022 کو ایف سی اے پر عوامی سماعت کی۔ فیول ایڈجسٹمنٹ کی مد میں جو کمی بنتی تھی وہ کردی گئی۔
نیپرا کے مطابق لائف لائن صارفین اور ماہانہ 300 یونٹس تک بجلی استعمال کرنے والے گھریلو صارفین پر کمی کا اطلاق نہیں ہوگا۔ اعلامیے کے مطابق زرعی صارفین اور الیکٹرک وہیکل چارجنگ اسٹیشنز پر بھی بجلی کی قیمت میں کمی کا اطلاق نہیں ہوگا۔
