مہنگائی سے پریشان عوام کو ایک بار پھر بجلی کا زوردار جھٹکا دے دیا گیا۔ نیپرا نے فیول پرائس ایڈجسٹمنٹ کی مد میں کے الیکٹرک صارفین کیلئے بجلی مہنگی کردی۔
نیشنل الیکٹرک پاور ریگولیٹری اتھارٹی (نیپرا) میں آج کے الیکٹرک کی درخواست پر سماعت ہوئی۔ فیول پرائس ایڈجسٹمنٹ کے تحت نیپرا نے کے الیکٹرک صارفین کیلئے بجلی 2 روپے 31 پیسے فی یونٹ مہنگی کرنے کی منظوری دے دی۔
میڈیا رپورٹس کے مطابق نیپرا کی جانب سے بجلی کی قیمتوں میں اضافے کے بعد کراچی کے صارفین پر 4 ارب 30 کروڑ روپے کا اضافی بوجھ پڑے گا۔ کراچی کے بجلی کے صارفین کو اگست میں یہ اضافی ادائیگیاں کرنا ہوں گی۔
نیپرا کے حکام کے مطابق یہ اضافہ جون کی ماہانہ فیول ایڈجسٹمنٹ کی مد میں کیا گیا ہے جس کا کے الیکٹرک کے لائف لائن صارفین پر اطلاق نہیں ہو گا۔ نیپرا حکام کا کہنا ہے کہ کے الیکٹرک نے اپنے وسائل سے 24 روپے 90 پیسے فی یونٹ بجلی پیدا کی۔ نیپرا کے حکام کا یہ بھی کہنا ہے کہ وفاق سے ملنے والی بجلی کی لاگت 11 روپے 56 پیسے فی یونٹ رہی۔
