شہر قائد میں بڑھتے ہوئے جرائم اور اسٹریٹ کرائم کی روک تھام کیلئے پولیس سرگرم ہوگئی۔ پولیس نے گزشتہ ہفتہ کراچی کے ایسٹ ، ویسٹ اور ساؤتھ زون میں مختلف چھاپوں کے دوران 792 سے زائد ملزمان کو گرفتار کرلیا۔
بول نیوز کی رپورٹ کے مطابق ترجمان کراچی پولیس کا کہنا ہے کہ گرفتار اسٹریٹ کرمنلز سے شہریوں سے لوٹ مار اور دیگر وارداتوں میں استعمال شدہ 175 سے زائد مختلف اقسام کا غیرقانونی اسلحہ برآمد کیا۔
ترجمان کراچی پولیس نے بتایا کہ شہر میں انسداد جرائم کے دوران ملزمان سے پولیس کے 20 مقابلے ہوئے، فائرنگ کے تبادلے میں 01 ڈاکو ہلاک جبکہ 27 زخمی ڈاکوؤں سمیت 36 ڈاکوؤں کو گرفتارکر کے 30 پستول، 11 موٹر سائیکلیں اور شہریوں سے چھینا گیا سامان تحویل میں لیا گیا، ملزمان سے برآمدہ اسلحہ فارنزک کیلئے روانہ کر دیا گیا ہے۔
ترجمان کراچی پولیس کے مطابق پولیس نے مختلف علاقوں میں کارروائیاں کرتے ہوئے مجموعی طور پر چھینی و چوری شدہ 68 موٹر سائیکلیں اور 04 گاڑی تحویل میں لے لی۔
منشیات کے خلاف جاری مہم کے دوران مختلف علاقوں سے لاکھوں روپے مالیت کی 101 کلو گرام چرس، 570 گرام ہیروئن اور 02 کلو 30 گرام آئس برآمد کی گئی۔
ترجمان کراچی پولیس کے مطابق کراچی پولیس کی جانب سے جرائم کے خاتمے، امن و امان کی بحالی اور عوام کے تحفظ کیلئے کئے جانے والے اقدامات جاری رہیں گے۔
