پاکستان اور متحدہ عرب امارات (یو اے ای) کے درمیان معاہدہ طے پایا ہے جس کے تحت کراچی پورٹ کے ٹرمینل کا انتظام متحدہ عرب امارات کو دیا جائےگا۔ گورنر سندھ کامران ٹیسوری نے کراچی گیٹ وے کا افتتاح کردیا۔
کراچی پورٹ ٹرسٹ میں ابوظہبی پورٹس کے ساتھ معاہدے کی تقریب منعقد ہوئی۔ تقریب میں ابوظہبی پورٹس گروپ اور کراچی پورٹ ٹرسٹ کے درمیان معاہدہ پر دستخط کئے گئے۔
وفاقی وزیر بحری امور فیصل سبزواری، وزیر اعلی سندھ سید مراد علی شاہ اور متحدہ عرب امارات کے سفیر اور قونصل جنرل بھی تقریب میں شریک ہوئے۔ متحدہ عرب امارات کے وزیر توانائی وانفرااسٹرکچر سہیل محمد المزروئی بھی موجود تھے۔
پورٹ ٹرسٹ کے چیئرمین سید سیدین رضا ، ابو ظہبی گروپ کے چیف ایگزیکٹیو آفیسر جمعہ شمسی اور دیگر بھی موجود تھے۔ گورنرسندھ کامران ٹیسوری نے کراچی گیٹ وے لمیٹڈ کا افتتاح کیا۔ کراچی گیٹ وے ٹرمینل لمیٹڈ ابو ظہبی پورٹس گروپ آپریٹ اور ڈیولپ کرے گا۔
گورنر سندھ کامران ٹیسوری کا خطاب میں کہنا تھا کہ اس معاہدے سے پاکستان اور متحدہ عرب امارات دو طرفہ تعلقات کو تقویت ملے گی۔ اس معاہدے سے کراچی گیٹ وے ٹرمینل کو عصر حاضر کے تقاضوں سے ہم آہنگ کرنے میں مدد ملے گی۔ پاکستانی معیشت مستحکم کرنے میں متحدہ عرب امارات کی سرمایہ کاری اہم ہے،
وزیراعلی سندھ مراد علی شاہ نے وفاقی وزیر فیصل سبزواری اور کے پی ٹی حکام کو معاہدہ کرنے پر مبارکباد دی اور تقریب سے خطاب میں کہا کہ یہ معاہدہ بحری تجارت، معاشی ترقی اور روزگار کے مواقع پیدا کریگا، ای ڈی پورٹس گروپ یو ایس ای کے میری ٹائم ٹریڈ روٹس میں سرمایہ کاری بھی کرے گا۔
ای ڈی گروپس ابوظہبی میری ٹائم بزنس ماڈل یہاں کے پی ٹی پر اپنائے گا، اس پروجیکٹ کے شروع ہونے سے معاشی اور بحری تجارت میں ترقی ہوگی۔ اس معاہدے میں یو اے ای اور پاکستان کے درمیان تجارت مزید مضبوط ہوگی۔
وفاقی وزیر بحری امور فیصل سبزواری کا کہنا تھا کہ کسی ملازم کو بیروزگار نہیں ہونے دیا گیا، پورٹ کی رائلٹی میں 12.5فیصد تک اضافہ متوقع ہے۔ ابو ظہبی پورٹس گروپ اسے منیج، آپریٹ اور ڈیویلپ کرے گا۔
