کراچی ٹریفک پولیس میں عارضی طور پر خدمات سرانجام دینے والے اہلکاروں کو سندھ کے مختلف اضلاع میں واپس تبادلہ کیا رہا ہے۔ 2900 ٹریفک پولیس اہلکاروں کو واپس انکی تقرری کے اضلاع میں بھیجا جائے گا۔
روزنامہ جنگ کی رپورٹ کے مطابق سندھ کے مختلف اضلاع میں دسمبر 2016ء میں بھرتی کیے گئے 3200 پولیس اہلکاروں کو 5 سال کے لیے تبادلہ کر کے مشروط طور پر ٹریفک پولیس میں تعینات کیا گیا تھا، ان اہلکاروں نے کراچی ٹریفک پولیس میں خدمات کے 5 سال مکمل کرلئے ہیں۔
رپورٹ کے مطابق اب ان پولیس اہلکاروں کو انکی بھرتی کے اضلاع میں واپس بھیجا جارہا ہے۔ کراچی پولیس آفس (کے پی او) ذرائع کے مطابق گزشتہ 5 سال کے عرصے میں لگ بھگ 150 اہلکار اچھے مستقبل کی خاطر پولیس کی ملازمت چھوڑ گئے۔
باقی بچنے والوں میں سے مستقل طور پر کراچی میں تعیناتی رکھنے کے خواہش مند پولیس اہلکاروں سے درخواستیں طلب کی گئی تھیں۔ لگ بھگ 300 سے زائد اہلکار کراچی پولیس میں رہنے کے خواہش مند ہیں جبکہ دیگر لگ بھگ 29 سو سے زائد اہلکار واپس جانا چاہتے ہیں، جن کے مرحلہ وار تبادلے کیے جا رہے ہیں۔
کے پی او ذرائع کے مطابق ان تمام اہلکاروں کو یک مشت واپس روانہ نہیں کیا جا رہا بلکہ ایسے اہلکاروں کے تین تین سو کے بیجز بنائے گئے ہیں۔ ہر دو تین ماہ بعد 300 اہلکاروں کو واپس ان کے اضلاع بھیجنے کا سلسلہ شروع کیا جائے گا۔
ٹریفک پولیس سے اہلکاروں کے سندھ کے مختلف اضلاع واپس جانے کے بعد خالی ہونے والی نشستوں پر کراچی میں براہِ راست اہلکاروں کی بھرتی کی جائے گی۔
