شہرقائد میں موسم گرما اپنے رنگ دکھانے لگا ہے۔ کراچی میں کل سے ایک بار پھر شدید گرمی کی لہر آنے کا امکان ہے۔ محکمہ موسمیات نے پارہ 41 ڈگری سے جانے کی پیشگوئی کردی۔
محکمہ موسمیات کے مطابق شہرقائد میں 30 مارچ سے شدید گرمی کی نئی لہر آئے گی جسکے دوران درجہ حرارت 39 سے 41 ڈگری تک جانے کا امکان ہے لیکن محسوس کئے جانے والا درجہ حرارت 43 ڈگری سے بھی تجاوز کرسکتا ہے۔
محکمہ موسمیات کے جاری کردہ الرٹ کے مطابق شہرقائد میں دن کے اوقات میں سمندری ہوائیں بند رہیں گی اور گرم او خشک ہوا کے باعث گرمی کی شدت زیادہ محسوس کی جائے گی۔
گرمی کی یہ شدید لہر یکم اپریل تک جاری رہنے کا امکان ہے۔ جسکے بعد سمندری ہوائیں بحال ہونے کے باعث درجہ حرارت میں کچھ کمی متوقع ہے۔ چيف ميٹرولوجسٹ سردار سرفراز نے اپريل کے آخر ميں ہيٹ ويو کا امکان بھی ظاہر کیا ہے البتہ رمضان المبارک کے آغاز میں موسم بہتر رہ سکتا ہے۔
سردار سرفراز کے مطابق اپریل کا معمول کا اوسط درجہ حرارت 35 ڈگری سینٹی گریڈ ہے، اور 10اپریل تک درجہ حرارت 35 سے 36 ڈگری سینٹی گریڈ کے رہنے کا امکان ہے۔ 11اپریل کے بعدایک بار پھر گرمی کی شدت میں اضافہ ہوسکتا ہے۔ افغانستان میں ہائی پریشر ایریا بننےسےکراچی میں ہواؤں کا رخ تبدیل ہوا۔
