شہرقائد میں تیز ہوائیں بھی انسانی زندگی کے لئے المیہ بن گئیں۔ محکمہ موسمیات کی پیشگوئی کے مطابق کراچی میں تیز ہواؤں کے جھکڑ چلنے کا سلسلہ شروع ہوگیا لیکن اس کے ساتھ ہی افسوسناک واقعہ بھی پیش آگیا۔
شہر میں تیز اور گرد آلود ہوائیں چلنے کے باعث گھروں کی چھتیں اڑنے اور دیواریں گرنے کے واقعات پیش آئے۔ ریسیکو حکام کے مطابق شیر شاہ گلبائی اور نارتھ ناظم آباد میں تیز ہواؤں کے باعث زیر تعمیر دیواریں گرگئیں جسکے نتیجہ میں 2 افراد زندگی کی بازی ہار گئے۔ دونوں افراد کے لاشیں اسپتال منتقل کردی گئی ہیں۔
محکمہ موسمیات کے مطابق شہر قائد میں جنوب مغرب کی سمت سے 50 سے 70 کلومیٹر فی گھنٹہ کی رفتار سے ہوائیں چل رہی ہیں۔ تیز ہوائیں چلنے سے کراچی میں گردوغبار کا طوفان ہے اور بعض مقامات پر حد نگاہ نصف کلومیٹر سے بھی گھٹ گئی ہے۔
چیف میٹرلوجسٹ سردار سرفراز کے مطابق تیز مغربی ہواؤں کا سلسلہ رات تک جاری رہنے کا امکان ہے۔ سردار سرفراز نے شہریوں سے پرانے درختوں اور سائن بورڈ سے دور رہنے کی ہدایت کرتے ہوئے محتاط رہنے کی اپیل کی ہے۔
