کورونا کی پانچویں لہر کا زور ٹوٹنے کے بعد مہلک وائرس کے کیسز میں مسلسل کمی ہورہی ہے۔ پاکستان کا سب سے بڑے شہر کراچی میں بھی کورونا کے مثبت کیسز کی شرح 5 فیصد سے کم ہوگئی ہے۔ جمعرات کے روز مثبت کیسز کی شرح 4.09 فیصد ریکارڈ کی گئی۔
محکمہ صحت سندھ کی جانب سے جاری کردہ اعداوشمار کے مطابق کراچی میں گزشتہ چوبیس گھنٹوں کے دوران صرف 150 کیسز رپورٹ ہوئے۔ سندھ بھر میں مجموعی طور پر 527 کورونا کیسز سامنے آئے۔ سندھ بھرمیں 706 اومیکرون کیسز کی تصدیق کی جاچکی ہے۔
نیشنل کمانڈ اینڈ آپریشن سینٹر (این سی او سی) کی جانب سے جاری کردہ تازہ اعدادو شمار کے مطابق گزشتہ 24 گھنٹوں کے دوران ملک بھر میں مزید ایک ہزار 122 کورونا کیسز رپورٹ ہوئے۔
پاکستان میں عالمی وبا کورونا وائرس سے مزید 25 افراد جاں بحق ہو گئے جس کے بعد اموات کی مجموعی تعداد 30 ہزار 139 ہو گئی۔ این سی او سی کے مطابق ملک میں کورونا کیسز کی مجموعی تعداد 15 لاکھ 6 ہزار 450 ہو گئی۔
گزشتہ چوبیس گھنٹوں میں ملک بھر میں 41 ہزار 142 کورونا ٹیسٹ کیے گئے اور مثبت کیسز کی شرح 2.72 فیصد رہی۔
سندھ میں کورونا کے کیسز کی تعداد 5 لاکھ 66 ہزار 505، خیبر پختونخوا میں 2 لاکھ 15 ہزار 743، پنجاب میں 5 لاکھ 395، اسلام آباد میں ایک لاکھ 34 ہزار 169، بلوچستان میں 35 ہزار 316، آزاد کشمیر میں 42 ہزار 874 اور گلگت بلتستان میں 11 ہزار 448 ہو گئی ہے۔
