سندھ حکومت کے محکمہ ٹرانسپورٹ نے سندھ پیپلز انٹرا ڈسٹرکٹ بس سروس کی ٹیسٹ ڈرائیو شروع کرنے کا فیصلہ کرلیا۔ کل بروز ہفتہ شہرقائد میں تجرباتی طور بسیں چلائی جائیں گی۔
پیپلز بس سروس کے تجرباتی آپریشن کا فیصلہ صوبائی وزیر اطلاعات و ٹرانسپورٹ شرجیل انعام میمن کی زیر صدارت سندھ پیپلز انٹرا ڈسٹرکٹ بس سروس سے متعلق اجلاس میں کیا گیا۔
اجلاس میں سیکریٹری ٹرانسپورٹ عبدالحلیم شیخ ، سیکریٹری اطلاعات عبدالرشید سولنگی ، ایم ڈی سندھ ماس ٹرانزٹ اتھارٹی کیپٹن ریٹائرڈ الطاف حسین ساریو اور دیگر شریک ہوئے۔
صوبائی وزیرٹرانسپورٹ شرجیل میمن نے اجلاس میں ہدایت کی کہ بس سروس کا ٹیسٹ ٹرائل ہفتے کو شام 4 بجے شروع کیا جائے۔ پیپلز بس سروس کے روٹ ون پر ماڈل کالونی سے آواری ٹاور تک ٹیسٹ ڈرائیو کا انعقاد کیا جائے گا۔
شرجیل میمن کا کہنا ہے کہ کراچی کے شہری بے چینی سے بس سروس کے آغاز کا انتظار کر رہے ہیں۔ ٹیسٹ ڈرائیو کا مرحلہ مکمل ہونے کے چند روز بعد بس سروس کا باقاعدہ آغاز کردیا جائے گا۔
شرجیل میمن کا کہنا ہے کہ سندھ حکومت کراچی کے پبلک ٹرانسپورٹ کا دیرینہ مسئلہ حل کرنے جا رہی ہے۔ اس ضمن میں محکمہ ٹرانسپورٹ دن رات کام کر رہا ہے تاکہ شہریوں کو جدید ماس ٹرانزٹ کی سہولیات فراہم کر سکیں۔ محکمہ ٹرانسپورٹ کی کاوشیں عوام کو جلد نظر بھی آئیں گی۔
