پاکستان میں جاری ساتویں اور ڈیجیٹل مردم شماری کا عمل جاری ہے۔ 5 دن کے توسیع میں گنتی کے دوران کراچی کی آبادی میں 10 لاکھ سے زائد کا اضافہ ہوا۔ مردم شماری میں مزید 5 دن کی توسیع کردی گئی ہے۔
ادارہ شماریات کے اعداد و شمار کے مطابق 5 دن کے دوران کراچی کی آبادی میں 12 لاکھ افراد کا اضافہ ہوا۔ ڈائریکٹر ادارہ شماریات سندھ منور علی گھانگرو نے بتایا کہ کراچی ڈویڑن کی اب تک کی آبادی 1 کروڑ 50 لاکھ سے زائد ہے۔
منور گھانگرو کے مطابق حیدرآباد ڈویژن کی آبادی ایک کروڑ 9 لاکھ سے ایک کروڑ 12 لاکھ ہو گئی ہے۔ لاڑکانہ کی آبادی 74 لاکھ سے زائد جبکہ میرپور خاص کی آبادی 48 لاکھ سے زائد ہے۔
اسی طرح شہید بینظیر آباد ڈویژن کی آبادی57 لاکھ سے زائد اور سکھر ڈویڑن کی آبادی 60 لاکھ سے زائد ہے۔ ڈائریکٹر ادارہ شماریات سندھ نے بتایا سندھ کی آبادی 5 کروڑ 43 لاکھ سے زائد ہے۔
ملک میں جاری مردم شماری میں 20 اپریل تک توسیع کر دی گئی۔ ادارہ شماریات کے مطابق کراچی، لاہور، راولپنڈی، بلوچستان اور جیکب آباد سمیت 20 اضلاع میں مزید 5 دن کی توسیع کر دی گئی ہے جو اب 20 اپریل تک جاری رہے گی۔
ترجمان ادارہ شماریات کے مطابق مردم شماری کی مانیٹرنگ کمیٹی کا اجلاس وفاقی وزیر احسن اقبال کی زیر صدارت اجلاس ہوا۔ اجلاس میں ایم اکیو ایم کے رہنماء اور وفاقی وزیر امین الحق بھی شریک تھے۔
ادارہ شماریات کے مطابق اجلاس میں مردم شماری کی تاریخ میں توسیع کا فیصلہ کیا گیا۔ ترجمان ادارہ شماریات کے مطابق ملک کے 122 اضلاع کی مردم شماری مکمل ہو چکی ہے، اب تک کی مردم شماری کے مطابق پاکستان کی آبادی 23 کروڑ 4 لاکھ سے تجاوز کر گئی۔
