کراچی کے علاقے شاہ لطیف ٹاؤں میں ڈاکوؤں نے بیوہ خاتون اور اسکے کمسن بیٹے کی جان لے لی۔ ڈکیتی کے دوران ڈاکوؤں نے انتہائی بے دردی سے قتل کیا اور فرار ہوگئے۔
جیو نیوز کی رپورٹ کے مطابق افسوسناک واقعہ کراچی میں شاہ لطیف ٹاؤن تھانے کی حدود میں قائدآباد گوشت گلی میں پیش آیا جہاں نامعلوم افراد ڈکیتی کی غرض سے گھر میں داخل ہوگئے۔
نامعلوم ملزمان نے گھر میں بیوہ خاتون کو تیز دھار آلے سے قتل کردیا جبکہ خاتون کے 2 سالہ بچے کو پانی کے ٹینک میں ڈبو کر قتل کردیا۔ مقتولہ کی شناخت 35 سالہ فائزہ کے نام سے ہوئی جبکہ بچے کی 2 سالہ زوہان سے نام سے ہوئی ہے۔ پولیس کے مطابق خاتون گھر میں عدت پر تھیں اور شوہر کے انتقال کے بعد گھر میں اکیلی ہی رہتی تھیں۔
جیو نیوز سے خاتون کے بھتیجے حماد نے بتایا ہے کہ شام میں چچی کے گھر کا چکر لگایا تو مرکزی دروازہ بند نہیں تھا بلکہ کمرے کا دروازہ اندر سے بند تھا، اس کے بھی 2 ،3 دفعہ چکر لگایا تو پھر ہمیں شک ہوا۔
رات 8 بجے کے بعد میری والدہ اور بہن آئے، کھڑکی سے جھانک کر دیکھا تو چچی خون میں لت پڑی تھیں، جبکہ بچے کی لاش پانی کے ٹینک سے ملی ہے۔پولیس کے کرائم سین یونٹ نے جائےوقوعہ سے شواہد اکٹھے کرلئے ہیں۔
رپورٹ کے مطابق گھر کی الماری کھلی ہوئی تھی اور گھر سے سونا اور نقد رقم اور مقتولہ کا موبائل فون بھی غائب تھا، مقتولہ اپنے شوہر کی دوسری بیوی تھی، پہلی بیوی سے مقتولہ کے شوہر کو کوئی اولاد نہیں تھی۔
