شہر قائد میں اسٹریٹ کرمنل بے لگام ہوگئے۔ بے رحم ڈاکوؤں نے ایک اور شہری کی جان لے لی۔ گلشن اقبال میں ڈکیتی کے دوران مزاحمت پر سیکیورٹی گارڈ کو قتل کردیا گیا۔
کراچی کے علاقے گلشن اقبال بلاک 16 میں ڈکیتی کی واردات ہوئی۔ ڈکیتی کے دوران سیکیورٹی گارڈ سیف اللہ نے ڈاکوؤں کو پکڑنے کی کوشش کی تو ملزمان نے فائرنگ کردی۔
فائرنگ کے نتیجہ سیکیورٹی گارڈ سیف اللہ جاں بحق ہوگیا۔ ڈاکو واردات کے بعد سیکیورٹی گارڈ کا بھی اسلحہ ساتھ لے کر فرار ہوگئے۔
گزشتہ روز نارتھ ناظم آباد میں بھی ڈاکوؤں نے سماء ٹی وی کے صحافی کو فائرنگ کرکے ہلاک کردیا تھا۔ پولیس نے مقدمہ درج کرکے ملزمان کو پکڑنے کیلئے تحقیقات کا آغاز کردیا تھا۔
واضح رہے گزشتہ چند ہفتوں میں شہر کراچی میں اسٹریٹ کرائم کی وارداتوں میں اضافہ دیکھا گیا ہے۔ کراچی پولیس چیف کی تبدیلی کے بعد بھی کراچی میں اسٹریٹ کرائم کی وارداتیں تھم نہیں سکیں اور تقریباً روز ہی شہری اپنی جان و مال سے ہاتھ دھو رہے ہیں۔
ایڈیشنل آئی جی غلام نبی میمن کا کہنا ہے کہ اسٹریٹ کرائم کی روک تھام کیلئے کوششیں کی جارہی ہیں۔ جلد شہر میں امن و امان کی فضا قائم کرنے میں کامیاب ہوجائیں گے۔
