پی ٹی آئی کے رکنِ سندھ اسمبلی سر بلند خان نے کراچی کے صوبائی حلقے پی ایس 112 میں ہوئی دوبارہ گنتی کو سندھ ہائی کورٹ میں چیلنج کر دیا۔
درخواست گزار سر بلند خان نے مؤقف اختیار کیا ہے کہ 2 ماہ سے اسمبلی کے اجلاس میں شریک ہو رہا ہوں، کل دوبارہ گنتی کرائی گئی۔
سربلند خان کا موقف ہے کہ قوائد کے مطابق دوبارہ گنتی 5 فیصد یا اس سے کم ووٹوں کے فرق پر ہوتی ہے۔ سر بلند خان نے مؤقف اپنایا ہے کہ مجھے پیپلز پارٹی کے امیدوار پر 11 فیصد ووٹوں کی برتری حاصل تھی۔
سندھ ہائی کورٹ سے دائر درخواست میں سر بلند خان نے استدعا کی ہے کہ آر او کے پیپلز پارٹی کے امیدوار کو کامیاب قرار دینے کے فیصلے کو کالعدم قرار دیا جائے۔ سر بلند خان کی درخواست میں الیکشن کمیشن، ریٹرننگ افسر، پیپلز پارٹی اور دیگر کو فریق بنایا گیا ہے۔
واضح رہے کہ الیکشن کمیشن کی جانب سے کراچی کے ضلع کیماڑی کے صوبائی اسمبلی کے حلقے پی ایس 112 میں دوبارہ گنتی کے بعد پیپلز پارٹی کے محمد آصف کامیاب قرار پائے ہیں۔
الیکشن کمیشن کے ذرائع کے مطابق دوبارہ گنتی کے نتیجے میں پیپلز پارٹی کے محمد آصف نے 11 ہزار 724 ووٹس حاصل کیے۔عام انتخابات 2024ء میں پی ایس 112 سے پی ٹی آئی حمایت یافتہ آزاد امیدوار سر بلند خان کامیاب ہوئے تھے۔
