کراچی میں ٹریفک کی روانی کو بحال کرنے کیلئے شہربھر میں تجاوزات کے خلاف مہم کا آغاز کردیا گیا۔ ڈپٹی کمشنرز نے اپنے اپنے اضلاع میں کی جانے والی کارروائیوں کی رپورٹ کمشنر کراچی کو جمع کرادی۔
ضلع کورنگی میں شاہ فیصل کالونی میں شمع شاپنگ سینٹر شاہ فیصل کالونی نمبر 3، کلمہ چوک عظیم پورہ روڈ پر کارروائی کر کے تجاوزات ہٹادی گئیں۔ بلدیہ عظمٰی اور ٹاؤن میونسپل ایڈمنسٹریشن کے ساتھ مل کر پولیس کی مدد سے کارروائی کی گئی۔
ضلع جنوبی میں انسداد تجازات ٹیم نے بلدیہ عظمٰی کے ساتھ مل کر آئمہ رام پتم داس روڈ لیاری اور شو مارکیٹ گارڈن میں کارروائی کر کے تجازات کا خاتمہ کیا۔
ڈپٹی کمشنر کیماڑی جنید اقبال نے کمشنر کو رپورٹ میں بتایا یے کہ دیہہ موچ بلاک 1 ایل ڈی اے 42 اسکیم میں کارروائی کر کے 30 ایکڑ سرکاری زمین پر قائم تجاوزات کا خاتمہ کر دیا گیا۔ رپورٹ کے مطابق اسسٹنٹ کمشنر کی نگرانی میں کارروائی کی گئی۔
تجاوزات کے خاتمہ کی اس کارروائی میں ضلعی انتظامیہ اور انٹی اینکروچمنٹ فورس نے حصہ لیا رپورٹ کے مطابق زمین ایل ڈی اے کی ملکیت تھی جو کارروائی مکمل کر کے ایل ڈی اے کے حوالہ کر دی گئی یے۔
ڈپٹی کمشنر وسطی فواد غفار نے کمشنر کو آگاہ کیا ہے کہ ضلع وسطی میں ٹریفک میں رکاوٹ بننے والی تجاوزات کے خلاف بلدیہ عظمی کے ساتھ مل کر 2 مئی کو مہم شروع کی جائے گی جو ایک ہفتہ تک جاری رہے گی۔ کارروائی کو کامیابی سے مکمل کرنے کے لئے تمام اسسٹنٹ کمشنرز اور پولیس حکام کو الرٹ کر دیا گیا ہے۔
کمشنر کراچی سید حسن نقوی نے ڈپٹی کمشنرز کو کارروائی سے آگاہ رکھنے کی ہدایت کی ہے۔ کمشنر کراچی نے کہا ہے کہ تمام ڈپٹی کمشنرز اداروں سے مضبوط رابطہ رکھیں ان کی مدد کریں۔
