کراچی میں دماغ خور جرثومہ نے ایک اور شہری کی جان لے لی۔ شہرقائد میں نیگلیریا کا شکار ایک شخص کی ہلاکت رپورٹ ہوئی ہے۔ رواں سال ملک بھر میں اموات کی تعداد 8 ہوگئی ہے۔
میڈیا رپورٹس کے مطابق کراچی میں دماغ خور جرثومہ نگلیریا کا شکار 45 سالہ شخص انتقال کرگیا جسکی شناخت عدنان طارق کے نام سے ہوئی ہے۔ عدنان طارق نارتھ کراچی کا رہائشی تھا۔
واضح رہے کہ رواں برس ملک بھر میں نیگلیریا سے 8 اموات رپورٹ ہوچکی ہیں۔ رپورٹ کے مطابق 5 کا تعلق کراچی، ایک کا حیدرآباد ، ایک میر پور خاص اور ایک کا تعلق کوئٹہ سے ہے۔
طبی ماہرین کے مطابق نگلیریا فاؤلیری کی علامات میں سر درد، بخار، متلی، الٹی، گردن میں اکڑن، تبدیل شدہ ذہنی کیفیت اور دورے پڑنا شامل ہیں۔ نگلیریا فولیری دماغ کھانے والا امیبا ہے۔ اسے کلورین سے آسانی سے مارا جا سکتا ہے، اس سے بچنے کے لیے شہری پانی کے ٹینک میں کلورین ضرور ملائیں۔
