کراچی میں رات بھر وقفے وقفے کبھی تیز اور کبھی ہلکی بارش کا سلسلہ جاری رہا جبکہ بعض مقامات پر موسلا دھار بارش ہوئی۔ شہر میں مسلسل بارش کے پیش نظر پمپنگ اسٹیشن پر بجلی کے بریک ڈاؤن ہوا جس کے باعث حب کینال میں شگاف پڑ گیا۔
ترجمان واٹر کارپوریشن کے مطابق حب کینال میں شگاف پڑ گیا ہے، جس کے باعث شہر کو عارضی طور پر حب کینال سے پانی کی فراہمی معطل ہو گئی ہے۔
ترجمان نے بتایا کہ سی ای او واٹر کارپوریشن انجینئر سید صلاح الدین احمد نے ہنگامی بنیادوں پر کینال کی مرمت مکمل کرنے کے احکامات جاری کر دیے ہیں، مرمتی کام اگلے 72 گھنٹوں میں مکمل ہوگا۔
ترجمان کے مطابق ڈسٹرکٹ ویسٹ اور ڈسٹرکٹ کیماڑی میں حب کینال سے پانی کی فراہمی معطل ہوگی، اور متعلقہ علاقوں میں کے تھری کی متبادل لائن سے پانی کی فراہمی کی جائے گی، شہری کسی بھی پریشانی سے بچنے کے لیے پانی کا استعمال احتیاط سے کریں۔
واٹر کارپوریشن نے شہریوں سے التماس کی ہے کہ پانی کا ذخیرہ کر لیں تاکہ انھیں کسی پریشانی کا سامنا نہ کرنا پڑے۔
