کراچی میں محرم الحرام کیلئے پولیس نے سیکیورٹی پلان تشکیل دے دیا۔ شہر بھر میں محرم الحرام کے دوران 15 ہزار سے زائد سیکیورٹی اہلکار ڈیوٹی کے فرائض انجام دیں گے۔
میڈیا رپورٹس کے مطابق ترجمان کراچی پولیس کا کہنا ہے کہ محرم الحرام کے دوران کراچی پولیس کے 15 ہزار 287 افسران و اہلکار سیکیورٹی پر تعینات کئے جائیں گے۔ ڈسٹرکٹ ایسٹ میں 7 ہزار 50، ویسٹ میں 5 ہزار 940 اور ساؤتھ میں 2 ہزار 297 افسران و اہلکار محرم کی ڈیوٹی سرانجام دیں گے۔
پولیس کے ترجمان کا کہنا ہے کہ شہر میں 305 امام بارگاہوں کو حساس اور 62 کو انتہائی حساس اور 30 کو نارمل قرار دیا گیا ہے ۔ ڈسٹرکٹ ایسٹ کی امام بارگاہوں پر 448 اور مجالس پر 2306 افسران و اہلکار جبکہ ویسٹ کی امام بارگاہوں پر 506 اور مجالس پر 906 اور ساؤتھ کی امام بارگاہوں پر 284 اور مجالس پر 783 افسران و اہلکار سیکیورٹی پر مامور ہوں گے۔
ترجمان پولیس کے مطابق شہر کے انتہائی حساس مقامات پر 1267 افسران و جوان فرائض سر انجام دینگے۔ اسپیشل سیکیورٹی یونٹس پر ماہر اسنائپرز مرکزی جلوس کے اطراف اور گزرگاہوں پر تعینات کئے جائیں گے۔
ترجمان کی طرف سے جاری بیان میں عوام سے اپیل کی گئی ہے کہ اپنے اردگرد نظر رکھیں اور کسی بھی مشکوک اور غیر معمولی صورت حال سے پولیس کو مددگار 15 پر فوری اطلاع دیں۔ عوام کے جان و مال کی حفاظت اور امن وامان کی بحالی کیلئے کراچی پولیس اپنا کردار ادا کرتی رہے گی۔
دوسری طرف محرم الحرام میں سیکیورٹی اقدامات کے لیے سندھ پولیس کا زیر تربیت اہلکاروں کو استعمال کرنے کا فیصلہ کیا گیا ہے۔ سندھ بھر میں پولیس ٹریننگ اسکول سے اہلکاروں کو تعینات کیا جائیگا۔
آئی جی سندھ غلام نبی میمن نے زیر تربیت اہلکاروں کو طلب کرلیا۔ سندھ بھر میں 7 ہزار سے زائد زیر تربیت اہلکاروں کو تعینات کیا جائیگا۔
کراچی میں 2 ہزار سے زائد خواتین اور مرد پولیس اہلکاروں کو تعینات کیا جائیگا۔ حیدرآباد میں 17 سو، میر پور خاص میں 6 سو سے زائد اہلکار تعینات کئے جائنگے۔ سکھر میں 834، لاڑکانہ میں گیارہ سو سے زائد زیر تربیت اہلکار تعینات کئے جائنگے۔ زیر تربیت اہلکار مختلف پولیس ٹریننگ اسکولز سے طلب کئے گئے ہیں۔
