سندھ کے وزیر اطلاعات ، ٹرانسپورٹ و ماس ٹرانزٹ شرجیل انعام میمن کی خصوصی ہدایات پر محکمہ ٹرانسپورٹ کراچی میں غیرقانونی بس اڈوں اور اضافی کرایہ وصول کرنے والوں کے خلاف سرگرم ہوگیا۔
میڈیا رپورٹس کے مطابق محکمہ ٹرانسپورٹ نے کراچی میں تاج کمپلیکس، صدر، ریمبو سینٹر، صغیر حسین شہید روڈ پر واقع غیر قانونی بس اڈوں کو ختم کیا گیا۔
مختلف اضلاع میں عید کے موقع پر اضافی کرایہ وصول کرنے والے ٹرانسپورٹرز پر جرمانے بھی عائد کیے گئے اور ٹرانسپورٹرز سے اضافی کرائے کی رقم مسافروں کو واپس دلوائی گئی۔ مجموعی طور پر 489 گاڑیوں کو چیک کیا گیا اور مسافروں سے معلومات لے کر کارروائیاں کی گئیں۔
اس دوران اضافی کرایہ وصول کرنے والوں پر ایک لاکھ 47 ہزار تک کے جرمانے عائد کیے گئے اور مسافروں سے کرائے کی مد میں اضافی لیے گئے 3 لاکھ 23 ہزار روپے واپس کروائے گئے۔
حیدر آباد، میر پور خاص، بینظیر آباد، سکھر، لاڑکانہ، ٹھٹھہ، بدین، تھر پارکر، عمر کوٹ، سانگھڑ، نوشہرو فیروز، گھوٹکی، خیر پور، جیکب آباد، شکار پور اور دادو میں بھی محکمہ ٹرانسپورٹ نے اضافی کرایہ وصول کرنے والوں کے خلاف کارروائیاں کی گئیں۔
وزیرٹرانسپورٹ سندھ شرجیل انعام میمن کا کہنا ہے کہ مسافروں کو پریشان کرنے والوں کو معاف نہیں کیا جائے گا۔ حکومت سندھ عوام کو ہر طرح کا ریلیف دینے کے لیے پُرعزم ہے۔
