-
-
شہرقائد میں جرائم کی وارداتوں پر قابو پانے اور عادی مجرموں پر نظر رکھنے کیلئے کراچی پولیس نے مجرموں کو ٹریکر لگانے کا منصوبہ بنالیا ہے۔
کراچی پولیس چیف ایڈیشنل آئی جی غلام نبی میمن کا اس حوالے سے کہنا ہے کہ ٹریکر بینڈ کے ذریعے عادی مجرموں پر نظر رکھی جائے گی، ٹریکر ملزمان کے ٹخنوں یا کلائی پر باندھا جائے گا۔
ایڈیشنل آئی جی کراچی کا کہنا ہے کہ عدالت کے حکم پر عادی جرائم پیشہ افراد کو ای ڈیوائس لگائیں گے۔ عادی مجرموں کو تھرڈ پارٹی کے ذریعے ٹریکر لگایا جائے گا اور تھرڈ پارٹی ہی ملزمان کی لوکیشن مانیٹر کرے گی۔
کراچی پولیس چیف کا بتانا ہے کہ ٹریکر کے ذریعے ملزمان کی نقل و حرکت مانیٹر ہوں گی۔ انہوں نے مزید کہا کہ اعداد و شمار کے مطابق 12 ہزار عادی مجرم شہر میں موجود ہیں۔
ایڈیشنل آئی جی غلام نبی میمن کے مطابق برطانیہ میں 25 سال سے عادی مجرموں کو ٹریکر کے ذریعے مانیٹر کیا جا رہا ہے۔
واضح رہے رواں سال شہر قائد میں جرائم کی وارداتوں میں اضافہ دیکھنے میں آیا، اسٹریٹ کرائم اور دیگر واقعات میں درجنوں شہری اب تک جان سے ہاتھ دھو بیٹھے ہیں جبکہ جرائم کرنے والے مجرمان یا تو آزاد ہیں یا ضمانت پر رہا ہیں۔
