کراچی میں ڈاکس تھانے کی حدود میں مولوی تمیز الدین روڈ پر کہکشاں سوسائٹی میں افسوسناک واقعہ پیش آیا۔ سینیئر سپریٹنڈنٹ پولیس کیماڑی فداحسین کے مطابق ضعیف العمر تاجر نے خود کو گولی مار کر زندگی کا خاتمہ کرلیا۔ 69 سالہ امیرالدین ٹپال نے مبینہ طور پر اپنے گھر میں ہی پوائنٹ 22 کے پستول سے گولی مار کر خودکشی کی۔
امیرالدین ٹپال کو فوری طور پر کلفٹن کے نجی اسپتال منتقل کیا گیا لیکن وہ جانبر نہ ہوسکے۔ ایس ایس پی فدا حسین کا کہنا ہے کہ متوفی بیمار تھے اور ڈپریشن کا شکار تھے۔ ابتدائی طور پر واقعہ خودکشی کا لگ رہا ہے۔ امیرالدین کی لاش کا پوسٹ مارٹم کیا جائے گا۔ ڈاکس پولیس واقعہ کی مزید تحقیقات کررہی ہے۔
پولیس کے مطابق امیرالدین ٹپال کے دیگراہلخانہ بیرون ملک مقیم ہیں۔ وہ گھر میں اپنی بیٹی کے ساتھ رہائش پذیر تھے۔
