-
-
شہرقائد میں اسٹریٹ کرائم کی وارداتوں میں روز بروز اضافہ ہورہا ہے۔ دن دیہاڑے شہریوں لوٹتے ڈاکوؤں کو روکنے میں پولیس بھی ناکام نظر آتی ہے۔ ایسے میں شہریوں نے خود ہی اپنی مدد آپ کے تحت ڈاکوؤں کو پکڑنا شروع کردیا۔
میڈیا رپورٹ کے مطابق کراچی کے علاقہ ایف بی ایریا دستگیر میں موٹرسائیکل سوار 2 ملزمان نے ایک شہری سے لوٹ مار کی، واردات کے بعد ڈاکو فرار ہورہے تھے کہ ایک شہری نے ڈاکو کو پکڑ کر نیچے گرادیا جسکے نتیجہ میں دوسرا ملزم بھی گرگیا۔
اس دوران راہگیر اور علاقہ مکین جمع ہوکر شہری کی مدد کو پہنچ گئے۔ شہریوں نے ڈاکوؤں سے پستول چھین کر انہیں تشدد کا نشانہ بنایا۔ دونوں ملزمان کو ذدوکوب کرنے کے بعد پولیس کے پہنچنے پر انکے حوالے کردیا گیا۔
پولیس واقعے کی مزید تحقیقات کررہی ہے۔ پولیس کے مطابق گرفتار ملزمان کی شناخت عامر اور ایاز کے ناموں سے ہوئی، دونوں ملزمان اس سے قبل بھی گرفتار ہوکر جیل کی ہوا کھاچکے ہیں۔
