کراچی کےعلاقے کلفٹن میں بچی سے زیادتی کے دونوں ملزمان کو گرفتار کرلیا گیا، صوبائی وزیر اطلاعات شرجیل میمن نے بھی ملزمان کی گرفتاری کی تصدیق کردی۔
پولیس نے کراچی اور اندرون سندھ میں کارروائیوں کے دوران دو ملزمان کو گرفتار کرنے کا دعویٰ کیا ہے۔ حکام کے مطابق ایک ملزم کو ڈیفنس اور دوسرے ملزم کو ٹنڈوالہیار سے گرفتار کیا گیا۔
پولیس حکام کا کہنا ہے کہ واقع میں ملوث ایک ملزم واردات کے بعد فرار ہوکر ٹنڈوالہیار بھاگ گیا تھا جسے پولیس نے خفیہ اطلاع پر گرفتار کیا۔ ملزموں کو سی سی ٹی وی فوٹیج کی مدد سے گرفتار کیاگیا۔ پولیس کا کہنا ہے کہ ملزمان کا میڈیکل کرانے کیلئے انتظامات کیے جا رہے ہیں۔
میڈیا رپورٹس کے مطابق بچی کو دو روز پہلے زیادتی کا نشانہ بنایا گیا تھا، متاثرہ بچی کا خاندان سیلاب کی وجہ سے سندھ کے ضلع شکار پور سے کراچی آیا تھا، متاثرہ افراد کلفٹن روڈ پر سوتے تھے جبکہ عبداللہ شاہ غازی کے مزار سے لنگر کا کھانا کھاتے تھے۔
پولیس کے مطابق بچی صبح غائب ہوئی اور شام کو واپس ماں کے پاس پہنچی تو اس کی حالت غیر تھی، ماں اسپتال لے گئی جہاں بچی کے طبی معائنے میں اجتماعی زیادتی کی تصدیق ہوگئی۔
ایڈیشنل آئی جی کراچی کے حکم پر تحقیقاتی کمیٹی تشکیل دی گئی تھی جو معاملے کی تحقیقات کر رہی ہے۔
